LAING duha ka mga suspetsado ang nasikop sa kapolisan tungod na usab sa padayon nga pagpatuman sa Oplan one time big time operation sa managlahing dapit ning dakbayan sa Cagayan de Oro.

Nasikop sa mga otoridad gikan sa Police Station 1 sa Divisoria ang biktima nga nailang si Velito Mahusay, 22, minyo ug netibong lumulupyo sa Zone-8, Salay, Misamis Oriental.

Nasayran nga gi-isyu ni Hon. Evelyn Gamotin-Nery, presiding judge, Regional Trial Court (RTC), Branch 19 ang warrant of arrest batok sa suspetsado diin adunay criminal case no. 2017-1145 sa kasong reckless imprudence resulting to physical injury nga adunay piyansa nga P10 mil.

Nasikop ang suspek human matunol sa mga otoridad ang warrant of arrest diha mismo sa Security agency nga nahimutang sa J.R Borja-Tiano Streets ning dakbayan sa dihang nasiplatan ang presensiya niini.

Samtang nasikop usab sa tinugyanan sa kapolisan sa Police Station 3 sa Agora ang laing adunay warrant of arrest nga nailang si Joemanell Aleonar, hingkod ang pangidaron kinsa residente sa Kolambog, Lapasan ning dakbayan sa kasong pagpangawat niadtong Huwebes sa hapon.

Ang warrant ang gi-isyu usab ni Hon. Judge Jeoffre Acebido sa RTC, Branch 41 ning siyudad.

Sa pagkakaron, ang mga suspetsado ang anaa na sa tinugyanan sa kapolisan alang sa tukmang disposasiyon.