GIBALBAL ang giingon nga kahimtang sa mga gipadaotan og barang. Lupig pa’y gihampak og hanging itom samtang gitusoktusok og dagom ang munyika nga gatimaan sa gipahinungod nga dumot.
Kuyawa tuod kon pahimungtan ta ining matang sa silot nga dili gyod makiangayon.
Magtarong ta, pwera buyag! Apan dili gihapon ta luwas bisan pa’g magtuo ta nga tul-id atong binuhatan. Kay naa man gyo’y dili makauyon sa atong panglantaw ug taras. Bisan pa’g ligdong ug maninguha’g likay sa malapason nga binuhatan, mahimo gihapon kang hinaykan sa kapungot sa giyawaan nga kaaway. Mao ra’g ingon ini ang nahiagoman ni Dionisio ‘Diony” Cañete nga gikatahong’ gabagutbot kabahin sa gitawag niyang “unspeakable injustice.”
Gani, gitumanan siya sa Supreme Court sukad iyang gihangyo nga dili na siya magpalabot sa Rolls of Attorneys.
Matod pa niya, dili na niya maantos ang “disillusion, frustration, utter disappointment as well as humiliation and embarrassment inflicted by the highly unfair and brutally unjust action of my brothers in the legal profession.”
Ay, gitalikdan na gyod niya ang iyang pagka-abogado aron mahunong na kuno iyang kasakit ug kaulaw sukad nataktak ang siyam sa 10 ka kaso nga gipasaka niya batok sa usa ka tigpatigtayon niadtong 2015. Nanghinaot na lang siya nga ang nahitabo niya magpadayag kon unsa ka dunot ang pamalaod sa nasod diin gakayamukat kuno ang dunot nga pamaagi.
u00a0Hiwi, wa’y ayo! Bitaw, mao ra’g wa’y bili ang balaod samtang wa’y kutas ang kapintas sa gitawag ngaextra-judicial killing— kining pinatyanay nga patuya’g tamay sa balaodnong pamaagi sa hukmanan.
Lubog na pod ang pagtataw sa kaangayan kon tan-awon nato, pananglit, ang gidangatan ni Sen. Leila de Lima. Bisan pa’g buot niyang ipatigbabaw iyang bulohaton isip magbabalaod pinaagi sa pagsusi sa lihok sa pamuno, gisayon-sayon ra intawon siya’g tamay ni Duterte ug sa mga sumusunod ini tungod lang kay kusganon iyang panghinaway sa binagis nga bulohaton sa kagamhanan.
Bitaw, gapatuyang lang gyod baya si Duterte— wala’y pagtahod sa tawhanong katungod samtang gipatuman niya ang ihalas nga balaod sa lasang— pinaagi sa pinutong nga pagpakgang ining gubot nga suliran sa ginadiling druga. Samtang gibilanggo si de Lima ug padayong’ gawasnon ang mga drug lords, ambot lang kon wala ba pod kaha malipong ang gadahom pa’g salig nga ang katarong ug kaangayan mao’y maghari sa kataposan.
Sa kasamtangan, ang pamalaod sa nasod dayag nga dapig sa mga gamhanan nga sagad nabulahan sa pangurakot.
Ay, ambot lang kon madutlan pa kaha ni sila’g barang hangtod mosamot kabusdik ilang tiyan ug mogawas sa ilang mata, ilong, ug dunggan ang mga uk-ok, kuto, ug uhipan.
(geemyko@gmail.com)