BUOT ni Konsehal Cynthia Cinco-Remedio sa dakbayan sa Mandaue nga himuong half-day nga non-special holiday ang unang Lunes sa Marso matag tuig alang sa mga babaye nga kawani sa city hall.
Si Remedio. kinsa maoy pangulo sa komitiba sa kababayen-an, niingon sa iyang Ordinance No.21-2017 nga angayang lang nga ilhon ang importanteng papel sa kababayen-an sa pagpanday sa nasod.
“Women in the workforce deserve to be recognized for their significant contributions to the development of the City of Mandaue,” matod ni Remedio.
Nasuta ning mantalaan nga di mominos sa 3,000 ka mga kawani sa city hall mga babaye.
Kun maaprobahan ang ordinansa, ang mga babayeng kawani sa city hall makapahimus sa half-day nga holiday nga may sweldo gikan sa kagamhanan sa dakbayan.
Sa panahon ni kanhi mayor Jonas Cortes, ang tanang mga babayeng kawani sa city hall gihatagan og pribilihiyo sa gipatuman nga half-day holiday nga may sweldo atol sa selebrasyon sa adlaw sa mga kababayen-an.
Apan pabiling gimanduan niini ang tanang mga department head nga pabiling patrabahuon ang ubang mga kawani aron di maputol ang importanteng serbisyo sama sa mga nadestino sa Mandaue City Hospital ug City Health Department.