USA ka 33 anyos nga lalake ang gidunggab sa iyang higala samtang kini nangaon sa Muelle Wharf, Barangay Poblacion, Pusok, dakbayan sa Lapu-Lapu kagahapon sa buntag.
Ang biktima mao si Gilbert Duran, ulitawo, taga Sitio Bayabas, Barangay Canjulao sa dakbayan.
Matod ni PO3 Marven Saraum sa Lapu-Lapu City Police Office (LLCPO) nga atol sa insidente mga alas 10:30 sa buntag, malipayong nangaon ang biktima uban sa iyang mga higala ug sa suspek nga nailhan lang sa pangan nga Piskat.
Giingong kalit nga nasuko si Piskat ug misinggit kini og “bastos ka!” ngadto ni Duran ug sa way pagduha-duha gidunggab ang biktima sa iyang buko-buko.
Nakadagan ug nakapangayo pa og pakitabang ang biktima sa kapulisan ug kini daling gidala sa Lapu-Lapu City District Hospital.
Atol ning pagsuwat, padayon pang gipangita sa kapulisan si Piskat kinsa nakasibat atol sa hot-pursuit operation.
Samtang usa usab ka 21 anyos nga lalake ang nakuyapan human gihapak og longboard sa San Roque, Barangay Pusok, kagahapon sa kaadlawon.
Giila ang biktima nga si Jomar Booc, ulitawo, taga Booc compound samtang mihapak kaniya mao si Calvin Tuñacao, 21.
Matod sa kapulisan nga wa nagkasabot ang suspek ug ang biktima atol sa insidente.