MOABOT sa 500 ka mga bata ang gipakaon sa artsidyosesis sa Sugbo kagahapon inabagan sa pribadong sektor sa paghandom sa Tables of Hope sa miaging 51st International Eucharistic Congress niadtong 2016.
Si Padre Carmelo Diola, chairman sa Committee on Solidarity and Communion, niingon kasagaran sa mga bata kay mga first communicant sa IEC 2016 diin ang misa gipangulohan ni Cebu Archbishop Emeritus Ricardo Cardinal Vidal.
Ang kalihokan kagahapon gisugdan og santos nga misa sa kapilya sa IEC Pavilion nga gisaulog ni Diola ug gisunod ang paniudto diin litson baboy ang usa sa mga sud-an.
Ang mga bata gipahinumdoman nga pangitaon og una ang gingharian sa Ginuo ug ang mga butang nga ilang gikinahanglan ilahang maangkon.
Si Desiree, 10, nagpasalamat kay nakakaon sila og lechon kagahapon kuyog ang iyang duha ka mga igsuon, usa niini gihilantan pa.
Si Diola nipaambit sa sugilanon sa mamaligyaay og tubig nga si Jay Kummer “Dodoy” Teberio nga bisan sa kalisod, nakalampos sa iyang pagtuon sa kolehiyo gumikan sa kugi ug paningkamot; ug usa ka kanhi batang libudsuroy, nga gisagop og usa ka pulis nga karon usa na usab ka babaye nga pulis.
Siya nitug-an nga dunay nahunahunaan si Arsobispo Jose Palma nga mag-reunion ang mga first communicant sa 51st IEC nga gipahigayon dinhi sa Sugbo.
Siya nidugang nga magpadayon ang ilang pagpakaon sa mga batang libudsuroy.
“Kay ang iIEC dili man to event lang, it's a spirit and it's also a journey so, padayon ang panaw,” dugang ni Diola.
Sa miaging tuig, 1,000 ka mga bata nga libudsuroy, ang nabusog sa mga pagkaon nga gidalit sa mga nagpasiugda sa Table of Hope, sa pagpanguna sa mga artsidyosesis sa Sugbo ug Vancouver, Canada, nga nagbukas sa dakong kalihokan.
Sa kalihokan kagahapon, nitabang pagpahimutang sa mga bangko ug pagpatunhay sa venue ang mga drug dependent nga niapil sa programa nga gitambayayungan sa nagkalainlaing parokya ug gobiyerno sa Barangay Subangdaku, siyudad sa Mandaue.