DUHA ka mga dakbayan sa Metro Cebu nideklarar nga walay klase karong adlawa.

Mandaue City

Si Mayor Luigi Quisum­bing, sa iyang Facebook page, nidekalrar nga walay klase sa pre-school ug elementarya tungod sa welga apan moapil sa high school ug kolehiyo.

“In light of the nationwide transport strike tomorrow, I have decided to cancel classes at the Pre-SCHOOL and PUBLIC ELEMENTARY, February 26,” tipik sa pamahayag ni Quisumbing.

Nimando usab siya sa pag-andam sa duha ka buses ug ubang sakyanan sa dakbayan aron pag-ayuda sa mga pasahero.

“We have decided that to minimize whatever risk riding in larger vehicles may pose to the thousands of pre-school and elementary student..” dugang niya.

Nasayran sa Superbalita Cebu nga sagad sa sakop sa Pinagkaisang Samahan ng mga Tsuper at Opereytor Nationwide (Piston) nagbiyahe sa maong rota.

Talisay City

Samtang, si Mayor Eduar­do Gullas nisuspenso sa klase sa tanang ang-ang sa mga eskwelahan sa Talisay karong adlawa.

Ang kagamhanan sa siyudad sa Talisay mopagawas og tulo ka mga bus nga maoy sakyan sa mga molupyo nga matanggong atol sa welga.

Si Almond Dela Peña, pa­ngu sa City of Talisay Traffic Operations Development Au­thority (CT-TODA), nibutyag nga gawas sa tulo ka mga bus, giawhag usab niya ang mga barangay nga mopadagan sa ilang mga sakyanan aron makatabang.

Gibanabana nga moabot sa 300 ka mga pasahero gikan sa Talisay labi na kon buntag ug sagad niini mga tinun-an.

Si Dela Peña nipahibawo ang mga bus magsugod og paabot sa mga pasahero alas 6 sa buntag sa national highway sa Barangay Tabunok, duol sa merkado.

Nakig-alayon usab sila sa mga traffic enforcer sa dakbayan sa Sugbo kon asa mohunong ang mga bus.

Ang mga bus mosubay sa rota sa Tabunok paingon sa dan Leon Kilat, paingon sa dan Sanciangko, liko sa Tres de Abril sa National Bacalso Avenue balik sa Talisay.

Cebu City

Sa siyudad sa Sugbo, magpadayon ang klase sa mga publikong tunghaan, sumala ni Cebu City Assistant Schools Division Superintendent Dr. Danilo Gudelosao.

Si Gudelosao niingon nga minos lang ka mga tinun-an sa mga publikong tunghaan ang maapektuhan gumikan sa ilang gipatuman nga zo­ning, diin kon asa nga barangay nagpuyo ang mga estudyante, adto usab kini motungha.

“Tungod sa zoning, ang mga student nagtungha sa schools nga dili layo sa ilang gipuy-an,” pahayag sa opisyal sa Department of Education sa Superbalita Cebu.

Si Greg Perez, coordinator sa Piston, unang niingon nga tinguha nila nga moabot og 80 porsiyento ang maapektuhan sa dagan sa transportasyon sa Sugbo sa ilang welga.

Apil sa mga rota nga maapektuhan sa ilang kalihokan ang sa Mandaue, Lapu-Lapu ug mga barangay sa Mabolo, Guadalupe, Talamban ug Bulacao.

Ang Cebu Integrated Transport Cooperative (Citrasco) ug mayoriya sa National Confederation of Transportworkers Unity (NCTU) dili mouban sa welga.

Lapu-Lapu City

Ang kagamhanan sa dakbayan sa Lapu-Lapu ningpaandam sa mga bus sa mga barangay aron motabang og hakot sa mga pasahero nga matanggong nunot sa welga sa mga drayber ug operator nga ningsupak sa pagwagtang sa karaan nga mga public utility jeepney nga nagpanuigon og 15-anyos ug pataas.

Sa laing bahin, si Gob. Hilario Davide III walay deklara­syon bahin sa klase sa lalawi­gan, lakip sa DepEd province.