DEAR Papa Joe,
Tawga lang ko og Marie, 18, naa koy uyab 17 years old. Kini akong problema karon kay naa siyay pagka rude ug pangayuan niya ang si kinsa man nga iyang mauyab, bisan pa adtong friends pa mi.
Karon ra ni siya nisulti pag-uyab na namo. Mao sab na akong mabasahan sa ilang conversation sa iyang mga ex sa Facebook kay di ni siya man delete og message.
Mohatag man sad to iyang mga ex sauna kay di niya ipakita bisag kinsa, bisan pag close kaayo mi ani niya sa una.
Akong problema kay nakasugod na ko og hatag niya gud unya di sad ko maingon nga gikabuangan ko kay iya kong dalhon sa iyang parents ug relatives kay gipaila-ila. Unsa may akong dapat buhaton? Palihug tambagi ko. Salamat.
MARIE
Marie,
Day, di na maayo ang iyang binuhatan nga kabata pa niya, magpangayuan na siya sa iyang mauyab. Siguro naa siyay puhunan nga di mo makabalibad kay ganahan sad mo matawag nga uyab niya. Pero kon mahigmata na ka, anha pa ka mobuwag niya kay makita mo na.
Kon tan-awon nimo iyang mga ex, nakamata na. Mao nga samtang di pa dako imong nagasto o nahatag likay, na kay kon wala na kay mahatag, mangita na sab na og lain.
Ayaw og tuo anang gidala ka niya sa iyang ginikanan. Okay ra na nila kay total lalake ang ilaha.
Suwayi kuno og ingon iyang parents nga tigpangayuan ni siya, tan-awon nato mo okay ba. Kay kon okay lang, it runs in the blood.
Ang pinakamahinungdanon mao nga ayaw tawon usiki ang kwarta nimo kay hinagu-an na sa imong mga ginikanan, gitrabahuan na ug giapatud-an og singot.
Kana lay kuhai og base aron imong mahunahunag maayo ang imong sitwasyon nga nasudlan karon. Kana lang ug daghang salamat.
PAPA JOE
(sa inyong tampo ipadala lang sa papajoesuperb@gmail.com)