NAGKASINABOT na’ng mag-away sila si Filipino boxing icon Manny Pacquiao ug British boxing star Amir Khan karong Abril 23.

Ang duha ka kanhi sparring partners parehong mianunsyo niini sa social media. Kon asa ipahigayon ang away maoy wala pa ikabutyag.

“Negotiations between team Pacquiao and team Khan have come to terms for the April 23 bout as this is what the fans wanted,” pamahayag ni Pacquiao sa iyang Twitter account nga napatik sa www.boxingscene.com.

“My team and I have agreed terms with Manny Pacquiao and his team for a super fight,” tweet sab ni Khan.

Sa sayong bahin ning buwana, ang promoter ni Pacquiao nga si Top Rank boss Bob Arum mianunsyo nga aduna na’t kasabutan nga ikaharong ni Pacquiao si Australian Jeff Horn sa Suncorp Stadium sa Brisbane, Australia.

Paglabay sa usa ka semana, kalit lang kining milubog dihang mianunsyo ang Pambansang Kamao sa Pilipinas nga ang sunod niyang away ipahigayon sa Abu Dhabi o Dubai diin si Khan maoy nahisgutan nga kontra.

Sa sayong bahin ning semanaha, sila si Pacquiao ug Khan ningpabuhagay sa managlahing mga interbyu nga hapit na silang magsinabot aron paghatag og kahayag sa nagkasumpaking mga taho.

Si Arum mibutyag sa ESPN nga ang mga negusyante sa UAE mitanyag og $38 million aron makuha ang away. Apan gitataw ni Arum nga aduna siya’y pagduhaduha sa tanyag.

“Manny seems to believe they will come up with the money. I have some reservations whe­ther it will happen or not,” pagklaro ni Arum ning bag-uhay lang.

“The Australian deal is not going to happen now, because Manny is trying to get a fight done in the United Arab Emirates, and the people there favor him fighting Amir Khan.”

Si Pacquiao adunay 59-6-2, 38KOs nga rekord samtang si Khan naggunit og 31-4, 19KOs nga baraha.