SILA Jason Salubre sa Panabo City ug Kurt John Placencia sa Davao City ang midomina bag-ohay lang sa 9th Kidapawan Open Chess Championship didto sa Kidapawan City Convention Center.
Si top-ranked Salubre mipildi sa kauban nga six-pointer Panaboan Henry Roger Lopez, kinsa seeded second, pinaagi sa superior tiebreaks aron mokampeyon sa seven-round open division nga dunay 43 ka magduduwa.
Si national master Emmanuel Emperado mihimo og 5.5 puntos aron mopuwesto sa ikatulo samtang si Jhonnel Balquin dunay 5 puntos alang sa ikaupat puwesto.
Ang mikompleto sa top 10 mao sila Vic Michael Artieda, Harrison Maamo, Earl Rhay Mantilla, Allen Mirano, John Ray Batucan ug Philip John Leyson.
Samtang, si Placencia mihari sa junior under-15 crown human mitala og unom ka puntos samtang si Billy Samuel Ventanilla, Dayanara Flores ug Carl Andrew Castanas parehong miiskor og 5.5 points aron mosunod sa tulo ka puwesto.
Sila Pacholo Roie Eduarte ug Kenneth Sam Eduarte (5.5) kauban si Jeff Daniel Vitor ug Ces Nickel Butal (4.5), Vince John Dahan ug Michael Cuamag (4.0) anaa sa top 10.
Ang premyong kuwarta gihatag sa mga midaug sa torneyo nga gi-organisa sa Kidapawan Chess Club, Incorporated ug Batch 85-Notre Dame of Kidapawan Boys ug Girls Alumni Association, Inc. (MLSA)