(Pasiuna: Kini ang atong apas sumpay sa atong tubag sa sulat suliran nga gipadangat kanato ni Nonong of Tugbok District mahitungod sa iyang sitwasyon kung diin nagahian siya ug naglisud kini og kapalong.)

DEAR Nonong of Tugbok District,

Karon atong tukion ang uban pa nga mga hinungdan niining priapism.

Mamahimo usab nga mao kini ang sangputanan isip reaksyon sa ubang mga medisina. Ang pinakasagaran sa mga medisina nga maoy hinungdan niining priapism mao ang mosunod: mga tambal nga gina-injection sa kinatawo alang sa tambal sa dili na mogahi o erectile dysfunction susama sa papaverine ug alprostadil.

Ang laing mga grupo nga nataho nilakip sa mga tambal batok sa alta presyon, tambal batok sa pagkaliso sa utok susama sa chlorpromazine ug clozapine, mga tambal batok sa depresyon kung diin ang namatikdan mao ang trazodone, mga tambal batok sa kombulsyon ug pangpakalma ug pangpaestabilar sa buot susama sa sodium valproate, mga pangpanipis sa dugo, mga cantharides susama sa Spanish Fly ug mga druga nga pangpalingaw susama sa bino, ug mga ginadili nga druga susama sa marijuana, heroin ug cocaine.

Tan- awa daw og naa ka bay sitwasyon nga nahilambigit ka sa mga nahisgutan? Kung niapil ka sa mga ginadili nga druga, maayo gani kay wala ka naapil og katikangkang niadtong mga natokhang… hehe.

Kining priapism nahilambigit usab sa achalasia. Kining achalasia, kondisyon kini kung diin ang mga kaunoran sa baga nipalya sa pagrelax.

Mahitabo usab kini diha sa esophagus o tubo gikan sa tilaok ngadto sa tiyan, sa mga parte sa tinae, ug sa agianan sa hugaw. Ang priapism nahibaw-an usab nga nahitabo diha sa mga pinaakan sa mga kaka nga laag didto sa Brazil ug sa black widow spider.

Ang problema niining priapism mao ang mga komplikasyon nga hatud niini tungod kay ang priapism maoy hinungdan nga ang dugo magpabilin sa kinatawo sa dili na kasagaran nga hataas nga panahon, mao nga ang dugo mawad-an na hinuon og oxygen ug mao na ang mohatud sa kadaot sa mga kaunoran sa kinatawo.

Apan tungod kay taas-taas pa man gihapon ang atong pagahisgutan mahitungod niining imong sitwasyon, tuguti ako nga ato na usab kini nga padayunon ug pagtuki sa sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz.” Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o SunStar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)