BANSALAN, Davao del Sur -- Kapin 300 ka pamilya ang mibakwit aron di mapagan sa giyera dihang gisulong sa 39th Infantry Battalion (IB)sa Philippine Army ang giingong kampo sa mga rebeldeng New People’s Army.

Naabtan pa sa SunStar Davao Superbalita ang kapin usa ka oras nga binakbakay sa Sitio Mahayahay, Barangay Managa alas 11:00 sa buntag niadtong Sabado, Pebrero 25.

Kapin kun kulang 30 ka mga walhong komunista nga sakop sa Committee Front, 51 ilawom sa Sub-Regional Committee ug 3 Southern Mindanao Regional Committee ang gigukod sa kasundalohan human nakadawat sila og impormasyon gikan sa mga sibilyan nga nagtukod kini og kampo sa lugar.

Daling nangayo og suporta ang 39th IB gikan sa 10th Infantry Division (ID) hinungdan nga milupad dayon ang duha ka MG520 helicopters diin upat ka rounds sa rocket ug 100 rounds sa caliber .50 machine gun ang gipuntirya padung sa mga rebelde.

Banda ala 1:35 sa hapon migamit ang militar og 105 Howitzer Artillery ug duha ka rounds sa tag-as nga matang sa eksplosibo ang gipaboto padung sa nanagang mga NPA.

Mihimo dayon og clearing operation ang kasundaluhan ug ilang narekober ang usa ka M16 rifle, usa ka improvised explosive device (IED), duha ka cellphones ug duha ka backpacks nga adunay mga gamit medikal sa teroristang grupo.

Nasayran nga adlaw nga Byernes lamang gitukod sa mga NPA ang maong kampo apan naabtan sa militar nga adunay nangaon ug adunay nangaligo.

Nailog sa 39th IB ang lugar nga adunay sukod 150x100 metros nga mahimong kasudlan sa 80 ka mga tawo apan 40 lamang ka NPA ang nagpasilong niadtong higayona.

Aduna say mga gitukod nga tent ug usa ka payag sa lugar.

Hinuon, giklaro ni Lieutenant Colonel Harold Argamosa, commanding officer sa 39th IB, nga walay kinabuhing nakalas.

Dudang ni Argamosa di pa sab masuta kun pila ka mga kinabuhi ang nakalas ug naangol sa rebeldeng grupo.

Si Jonathan Arellano, Purok Leader sa Sitio Pluto sa lugar, nagbutyag nga 81 ka mga pamilya ang mibakwit sa patag nga bahin aron di madamay sa giyera.

Aminado sab ang molupyong si Rita Pellerin nga gibati siya og tumang kakulba sanglit unang higayon pa lang siyang nakakita og pagpamomba sa helicopter ug grabeng pinusilay mao nga paspas siyang midagan paubos.

Samtang, daling miresponde ang Municipal Social Welfare and Development Office ug Bansalan Disaster Risk Reduction and Management Team sa lugar aron dalhan og mga relief goods ang mga mibakwit nga sibilyan.