LANDING sa Northern Mindanao Medical Center (NMMC) ang usa ka ice cream vendor human nga nabanggaan og bus niadtong milabay nga adlaw diha sa Valenzuela/Mambato Junction, Lapasan ning siyudad sa Cagayan de Oro.

Kasamtangang detinado ang drayber sa Pabama Bus liner nga si Francis Loie Balbutin, 26, ulitawo ug residente sa Macanhan, Carmen ning siyudad human napunggitan ang biktima nga si Christopher Ortiz, 33, ulitawo ug lumulupyo sa Macajalar, Camaman-an ning siyudad kinsa usa ka ice cream vendor.

Sa imbestigasiyon sa kapulisan gikan sa Police Station 3 (PS3) sa Agora nasayran nga samtang gibaybay ni Balbutin ang kadalanan paingon sa Valenzuela Street aksidente niini nga nabanggaan si Ortiz kinsa paingon sa Mambato road dala ang ice cream nga bisekleta niini.

Giingong sa dihang paliko na unta ang maong bus nabanggaan niini ang maong bisekleta sa biktima hinungdan sa maong aksidente nga miresulta sa pagkaangol sa biktima kinsa dali nga gidala sa nahisgutang balay tambalanan.

Sa pagsulat niini nga balita kasamtangan pa nga nagpaalim sa NMMC ang biktima samtang ang drayber ang temporaryong gibalhog sa mini-cell alang sa dugang pa nga imbestigasiyon.