ILIGAN CITY - Gikumpirma sa kapulisan nga mga sakop sa lokal nga terorista'ng Maute Group ang tulo ka mga suspek nga mi-hijack sa negosyante'ng taga-Iligan, buntag niadtong Pebrero 24, samtang nagbiyahe kini kauban ang iyang pamilya sa may C3 Road sa Merila, Barangay Ubaldo Laya, ning siyudad.

Giila ni Senior Superintendent Leony Roy G. Ga, city director sa Iligan City Police Office, ang na na-aresto nga si Eyemen Canulo Alonto, human masapon ang gisakya'ng getaway vehicle sa may Sitio Camague sa Barangay Tomas Cabili.

Ang usa sa mga namatay giilang si Azam Ampatua samtang ang usa naila lamang sa alyas nga 'Wowie'.

Gisuta pa karon sa mga utoridad kung kini nga 'Wowie' maoy nakit-an sa usa ka hulagway nga nagbitbit sa duha ka pugot nga ulo nga iya sa mga saw mill workers nga taga-Iligan, kinsa gibihag ug gipunggutan sa Maute niadtong nakalabay'ng tuig didto sa Butig, Lanao del Sur.

Nakuha sa mga miresponde'ng elemento sa ICPO ug sa PNP-Special Action Force gikan sa mga namatay nga suspek ang usa M16 bushmaster ug kalibre .45 samtang nakuha gikan sa na-aresto ang kalibre .45, granada ug ang gikuha nga Hyundai Elantra.

Kung kahinumduman nga paingon unta sa ilang tindahan sa Barangay Tubod ang biktima dihang giharangan ang gimaneho'ng sakyanan, gipakanaug ang mga sakay, gi-ilog ang sakyanan dayung padagan ngadto sa Barangay Abuno, usa sa mga hinterland nga barangay sa Iligan.

Nagukod kini sa kapulisan nga mi-resulta sa pinusilay nga maoy hinungdan sa kamatayon sa duha ka mga suspek. Walay samaran sa tropa sa kapulisan.