IMPOSIBLE kaayo nga di mausab ang panagway sa Metro Cebu kon lingkuran kanunay sa kagamhanan ug pribadong sector. Labina gyud kon unsaon pagsulbad ang suliran sa trapiko nga maorag way kasulbaran nga makit-an. Management na lang ang mahimo aron moirog ang mga sakyanan nga naghuot sa kadalanan.
Ang dagko ug advance nga mga urban center sa gawas sa nasod nag-usab sa ilang dagway aron usab mausab ang mentalidad sa katawhan. Gibutangan og bikeways kun mga agianan sa mga biseklita ang ilang mga siyudad. Nagdasig kini sa katawhan sa paggamit sa biseklita isip paagi sa pag-ehersisyo ug transportasyon.
Sa Paris, France, dunay plano nga dunay dapit nga di na pasudlan sa mga sakyanan, kon di biseklita na lang ang gitugtan. Gawas nga makapaminos kini sa urban pollution, makadasig kini sa mga tawo sa paggamit sa biseklita isip paagi sa transportasyon.
Daghan
Ordinaryo nga tan-awon ang biseklita, apan daghan ang gidala niining mga kaayuhan di lang sa nagbiseklita, kon di sa komunidad sa kinatibuk-an. Daghang mga pagtuon nga nagsuporta sa maayong epekto niini sa panglawas. Sa palibot, ang mga dapit nga minos ang mga sakyanan nga gipaagi minos usab ang pollution. Minos ang pollution, minos usab ang mga sakit. Ang urban pollution usa sa mga hinungdan sa pagsaka sa mga kaso sa cancer ug uban pa.
Maayo usab kini sa negusyo tungod kay sagad sa mga biker mangaon kon manikad. Way biker nga manguli nga di mangaon, magkape ug moinom. Tungod kay magpanon ang mga manikad, makapadaghan usab kini sa mga kostumer. Kay gawas sa paglingawlingaw, ang biking usa usab ka paagi sa bonding sa pamilya ug mga managhigala. Kini maayo sa mga nagnegusyo og kan-anan, bakery ug uban pa.
Ang usa sa akong nahibaw-an gikan sa urban planners mao nga makapaminos usab kini sa paspas nga pagdaan sa mga edipisyo. Kay ang mga aso sa mga sakyanan maoy makapaitom sa mga bungbong. Mas minos ang mga sakyanan, mas minos ang aso busa dugay molagom ang mga pintal sa mga bungbong sa mga balay ug edipisyo.
Plano
Nakahibawo ko nga daghan og mga plano ang mga lider sa Sugbo karon kabahin sa biking. Usa ini mao ang paghimo sa mga kilid sa mga sapa sa Guadalupe ug Butuanon nga mga bike path.
Maanindot kini, labina kadtong mga mahiligon sa biseklita kay duna na silay masuroyan. Apan ang isyu dinhi di man kay lingawlingaw lang ang biseklita, kon di usa sa mga alternatibong transportasyon. Busa, mas importante ang bike lanes ug bike path sa mga karsada sa dakbayan sa Sugbo ug Metro Cebu. Alang nako, mas maayong unahon kini kay sa bike path.
Maora man gud og ulo-ulo lang ang pagbutang og mga bike path sa daplin sa kasapaan. Maora bag anha lang ibutang ang mga magbiseklita kay makasamok sa karsada. Di ko supak sa ideya, apan kinahanglan nga tipik lang kini sa paghimo sa Cebu city ug Metro Cebu nga bike friendly.