NAGDALAG kalibog niadtong Dominggo sa gabii ang sayop nga anunsyo sa Office of the Presidential Assistant for Visayas Michael Dino nga lakip ang Syudad sa Sugbo ang walay klase kagahapon tungod sa transport strike sa mga drayber.

Ato kining nabantayan sa mga binayloay og pangutana ug komentaryo sa mga tigbalita diha sa Facebook.

Matod pa, ang anunsyo basi sa memorandum gikan sa opisina ni Executive Secretary Salvador Medialdea. Apan si Konsehal Dave Tumulak ni-post sa anunsyo gikan sa kaulohan nga wala diay giapil ni Medialdea ang Syudad sa Sugbo.

Maayo na lang kay abtik ang atong mga sakop sa media aron makahatag og sakto ug pintok nga impormasyon.

Atong nasayran nga sa sayo pa, nangutana na si Medialdea sa mga buhatan sa LTFRB kabahin sa posibilidad nga momando nga way klase. Apan gipaabot ni LTFRB 7 Director Ahmed Cuizon ang desisyon sa Syudad sa Sugbo.

Niingon siya nga ang LTFRB motahud sa desisyon ni Ma­yor Tomas Osmeña nga ma­du­mala ang welga dinhi sa Syudad sa Sugbo. Matod pa, ang mas dagkong mga grupo sa mga drayber wala man mosalmot sa welga.

Moapil na lang

Bisan pa man, nianunsyo ang pipila ka mga tunghaan nga di sila magklase gikan sa elementary ngadto sa high school ug senior high. Gani, usa ka dakong unibersidad wa man magklase apil ang college level.

Tungod niini, atong nadunggan si Rudy Laconsa nga lider sa usa ka drivers’ group nga di na lang sila mobiyahe kay wa na may mga tinun-an nga manakay kay wa may klase.

Sa akong tan-aw, kining la­kang nga di magklase mao na hinuon ang gihimong rason alang sa wala unta mosalmot sa welga. Moguwa nga pa gani makalusad sa protesta ang Piston, nidaog na sila kay ang kagamhanan nag-una-una na man og mando nga di magklase. Nisu­nod sab dayon ang pipila ka tunghaan.

Basi sa sinulat ni Sun Tzu kabahin sa stratehiya, nakadaog na ang Piston ug ang mga nagwelgang drayber bisan wa pa magsugod ang welga.

Mga operator

Alang kanako hinuon, anga­yan unta nga dili ang mga drayber ug kagamhanan ang mag-atbang. Di sab ang mga drayber ug mga pasahero ang mag-away tungod niining isyo nga i-phase out ang mga karaang PUJ.

Makaayo man sa mga drayber nga mailisdan og mga bag-o ang mga karaan ug kagang-kagang nga mga PUJ. Gawas nga magsigi na lang og kaaberiya ug makadaot sa panginabuhi sa mga drayber, kalas pa gyud kini og gasolina.

Maayo lang kon di maka­mugna og grabing kahuot sa trapiko kay anha maaberiya sa taliwala sa dalan o makaaksidente pa kay mawad-an og brake. Kon buot hunahunaon, ha­ya­hay man kaayo ang mga operator nga imbes sila man unta ang angayang pit-on aron pang-ilisdan kining ilang mga kagang-kagang mga PUJ.

(@anol_cebu sa Twitter)