NALIPAY ko nga nakabasa sa Facebook nga nanawagan si Kap Philip Zafra sa Barangay Tisa nga manglimpyo na sila sa mga basura nga nagpasad human gibugwak gikan sa mga hugaw nga imburnal karong adlawa.
Bahala na lang kon resulta na lang kini sa mga pagsaway. Makapairog sab diay ang mga pagsaway. Maayo unta kon i-post na lang sab sa Facebook ang ilang kalihokan.
Ang akong pangutana karon kabahin niadtong iyang pamahayag nga naghulat siya sa P6 milyones nga badyet alang sa bag-ong drainage project sa barangay.
Dihang nibisita ko sa Cebu City Hall sa miaging semana man gud, nidalikyat ko sa pagpangayo og kopya sa resolusyon alang sa maong proyekto.
Ug atong nasayran nga kaniadtong Hunyo 26, 2013 napasar sa Konseho ang resolusyon nga naggahin og pundo ubos sa General Fund sa Supplemental Budget No. 5 sa calendar year 2010.
Ang nakapaisa na karon sa akong kilay kay nganong naghulat pa man ma-release ang maong budget karong 2015 na si Kap Zafra?
Nakahibawo na man gud kita nga si Kap Zafra ang presidente sa Association of Barangay Councils (ABC). Siya ang sinaligan ni Mayor Mike Rama. Ug wa nay problema kon approval sa Konseho ang hisgutan.
Nganong di man ma-implement ang proyekto human sa hapit duha ka tuig? Kinsa may nagbabag karon? O duna bay tapulan ug nagmika?
Laing pangutana: naa pa ba kining maong pundo? Wa kaha kini gihapak og laing gastuhanan sama niadtong budget alang sa CCMC apan maoy gigamit alang sa financial assistance sa mga senior citizens?
Di man sab gud makiangayon nga moingon dayon kita nga gibulsa na. Ang saktong pangutana sa pagka karon mao, nganong wa pa man na masugdi ang proyekto, Kap Zafra?
Samtang gusto ko makadungog sa imong tubag pinaagi sa usa ka pamahayag alang sa media, labing maayo kon imo mismong esplikaran ang imong kasilinganan sa Barangay Tisa nga kuyog nimo sa pagpanglimpyo sa basurang gibugwak sa imburnal sa miaging semana.
Guadalupe
Nagka-meeting na kami ni Joy Lodonia ug mga kaubanan sa Maghisgot Kitag Politika Bay, usa ka grupo sa Facebook nga moabot na karon og 10 mil ka sakop, nga magpasiugda og river cleanup karong Hunyo 21, 2015.
Alang sa mga interesado motabang, palihug coordinate lang pinaagi sa pag-PM kanako sa Facebook ug sa Twitter o sa atong MKPB forum mismo.
Duna lay usa ka concern nga gipaabot ang atong higalang si Marc Canton sa Movement for a Livable Cebu (MLC) ug mao kini ang pagsiguro nga protektado kita sa mga toxic materials unya nga gilabay sa maong sapa.
Usa kini sa atong susihon sa dili pa kita magpahigayon sa maong cleanup.
Ilo-ilo
Akong nasabtan nga nakapadasig sa MLC kabahin niining river cleanup ug rehabilitation mao mismo ang kasinatian sa Syudad sa Ilo-ilo. Kon mahimo man sa mga Ilonggo, nganong di man mahimo sa mga Cebuano?
Sa akong mubo nga pagsabot, nilambo ang mga river rehab projects didto sa Ilo-ilo ug ilakip na lang nato kining sa Pasig River tungod sab kay dunay mga nitumaw nga kampyon ang maong mga adbokasiya.
Sa Ilo-ilo, nangusog si Senate Speaker Franklin Drilon. Sa Metro Manila, naa si Gina Lopez sa pamilyang Lopez ug ABS-CBN.
Kinsa kaha ang motumaw nga kampiyon alang sa mga sapa sa Sugbo?
Kinit-an
Di lang binayloay sa mga mahait nga pulong ang nahitabo tungod sa pag-ugkat ni Kong. Toby Tiangco sa pagkatawo ni Sen. Grace Poe. Tipik kini sa paninguha sa kampo ni Bise Presidente Jojo Binay nga mobawos sa pagpirma sa senadora sa Senate sub-committee report kabahin sa grabing plunder sa Syudad sa Makati.
Gawas nga mabaw ang maong isyo, nitumaw hinuon ang sama sa teleserye nga istorya kabahin sa pagkatawo ni Sen. Poe nga giingong kinit-at diha sa simbahan sa Jaro.
Ug dako kaayo ang akong pagbahakhak dihang napatik ang balita nga adopted sab kuno diay si Binay. Maayo pa si Secretary Mar Roxas nimo kay gidasig hinuon ang senadora ug giingnang, “Be strong.”
(@anol_cebu sa Twitter)