ANG "kanhi laos nga pulitiko" motandi kanako ug ni Presidential Assistant for the Visayas Michael Lloyd Dino nga sama sa ok-ok. Kini nunot panagsunukliay nila og mainit nga pulong.
Nagkatinubagay sila si Dino ug kining kanhi laos nga pulitiko nunot sa pagpanggukod nga gihimo sa naulahi sa mga dagkong developers nga nakapalit og luna diha sa South Road Properties (SRP). Gihinganlan ni Dino ug ‘bully’ ingon anti-business og anti-poor ang kanhi laos nga pulitiko. Mao to nga mibawos usab siya og paghingalan ni Dino nga sama sa ok-ok. Ug ambot nganong gi-apil ko.
Unsay buot niyang ipasabot? Ok-ok ba ang akong dagway ug ni Dino? Pagkaguwapo namo. Kamong mga bumabasa dinhi sa Superbalita, daw ok-ok ba ang akong dagway base sa hulagway nga inyong nakita tapad ning akong lindog? Dili na lang ko mobawos og hingalan niya kay mahulog tang morag bata niana. Pero kon ok-ok ko, siya unsa man? Timos, tungaw o ba kaha kigwa? Kanang katol kaayo. Hitsura baya nimo. Mas dako pa man gani kag tiyan nako ug naa pa kay gitakin nga urine bag.
Pero kon ang iyang paghulagway nga ok-ok ko kay morag na-piste ang iyang mga plano ug mga personal nga katuyuan gumikan sa akong mga komentaryo ug mga pagsaway, diha siya nasayop. Ang akong mga opinyon nga akong gipabuhagay dinhi sa atong lindog ug sa akong programa sa dySS Super Radyo, ako kanang personal nga opinyon pinasikad sa atong nakita ug na-obserbahan sa mga isyo karon sa atong katilingban. Way kolor pulitika ug walay tawo nga nag-inpluwensiya kanako, kay una, dili ako pulitiko. Entitled ako sa akong kaugalingon nga opinyon.
Ang mga tawo lang nga yabag sama kaniya maoy mosuporta anang iyang hinanggaw nga lakang sa pagpanggukod anang mga negosyante. Kanang iyang mga buta ug bungol nga mga political supporters ug mga sipsip nga mga sumosunod sama anang Joel Marie Yu. Imong suportahan nang iyang gihimo batok sa SM Prime Holdings, Filinvest ug Ayala Land Inc.,nga klaro ug tataw man kaayo na nga personal nang iyang tumong. Panguwarta man gani na.