SUKWAHI sa gituohan, wa makaparalisa ang gipahigayong nation wide transport strike kagahapon dili lang dinhi sa Sugbo.

Kini tungod kay daghan gihapong mga public utility jeepneys (PUJ) ang namyahi bisan pa man sa awhag sa kadagkuan sa ilang pundok nga gipangulohan sa Pagkakaisa ng Samahan ng mga Tsuper at Opereytor Nationwide (Piston).

Sa dakbayan sa Sugbo giingong 10 porsiyento lang sa PUJ ang wala mobiyahe samtang sa siyudad sa Mandaue ug Lapu-lapu 20 porsiyento lang ang mituman sa panawagan sa Piston.

Sa niaging semana, ang Piston, Stop and Go Coalition ug No to Jeepney Phase-out Coalition ang nanawagan sa ilang mga sakop lukop nasod sa pagpahigayon og strike.

Kini isip protesta niining jeepney modernization program nga gilusad sa gobiyerno.

Sa kamandoan sa departamento sa transportasyon, dili na pabiyahi-on kadtong PUJ nga 16 na ka tuig ang panuigon.

Apan alang sa mga kadagkuan sa mga pundok nga milusad og protesta, kini paagi lang sa gobiyerno aron pagwagtang sa mga PUJ.

Ilang gipasabot nga kini usa ka pagdaog-daog ug paghikaw sa kapanginabuhian sa kabus nga mga drayber.

Dunay punto ang maong grupo niining bahina pero ang ilang pagpasabot ngadto sa ilang mga sakop pulos lang mga pangagpas. Walay tino ug walay anino sa kamatuoran ug posibling mao kini usa sa mga rason kon nganong ang uban dili kombinsido.

Labaw sa tanan, ang paglusad og transport strike kagahapon nagpamatuod lang nga kini dili epektibo kay lagi wala man kini makaparalisa sa publiko.

Ug sa samang higayon, posibling mahimo usab kini nga maoy sukaranan o basehan nga sa umaabot nga mga adlaw ang transport strike dili na angay ikabalaka sa publiko kay ang gobiyerno aduna nay alternatibo nga makaalkontra niini.