TAN-AWA ra og unsa gyud kahugaw ning pulitika. Usa pa gani ka tuig sa dili pa ang national ug local elections apan ang mga pulitiko nga mipakita na og interes nga modagan sa pagka-presidente, naglinabayay na og lapok aron dauton ang isig ka-ingon. Sumala og unsay nahitabo ni Vice President Jejomar Binay.
Kulatado kaayo. Sa boxing pa lagi, bisan asa lingi, piti. Maayo pay lumigid.
Ubay-ubay nga kaso karon sa pagpangurakot ang gi-atubang ni Binay. Apan bisan pa man niini nag-una gihapon siya sa mga presidentiable. Kon himoon ang eleksiyon karon, modaog gihapon si Binay.
Base sa survey, si Senador Grace Poe ra ang maka-ambas-ambas ni Binay ug siya na usab karon ang gidaot. Matod pa nga si Grace Poe dili kwalipikado nga modagan sa pagka-presidente o bise presidente gumikan kay kuwang sa residency requirement. Ang modagan sa pagka-presidente o bise presidente gikinahanglan nga napulo ka tuig nga nagpuyo dinhi sa nasud. Apil ang kagahapon ni Grace nga sinagop lang sa magti-ayong Fernando Poe Jr., ug Susan Roces gi-utingkay pa.
Matod pa nga si Grace anak ni kanhi Presidente Ferdinand Marcos ug actress Rosemarie Sonora, igsoon ni Susan Roces. Samtang si Davao City Mayor Rodrigo Duterte gidaot usab gumikan sa iyang pagpaluyo sa pagpamatay sa nga criminal didto sa iyang dakbayan.
Wala pa gani magsugod ang kampaniya, mituyhakaw na ang kahugaw sa pulitika.
Panahum
Ania tay nadawat nga email gikan sa atong suki nga bumabasa kabahin sa atong pang gobiyerno karon. Gikan ni Gerardo.Yagonia@WorleyParsons.com
Super Bob,
Good day. Usa ako sa imong tigpaminawan matag buntag sa radyo og asa Imong column sa Superbalita. Kini aron makakuha og mga inpormasyon sa sobrang pamulitika sa atong mga naglingkod sa katungdanan sa gobiyerno. Pero hangtod karon wala pa gihapoy kausaban ang mga pulitiko. Nagsige lang og padatu sa ilang kaugalingon ug ang mga kabus padayon gihapon sa ilang kakabus hangtud karon. Karon naa na say nitumaw nga K-12 system nga mao ang kunohay mag pa high standard sa education.
Pagkabati sa sestema sa atong gobiyerno karong panahuna. Kadto hinuong pulitiko nga dako og nahimo sa ilang nasud mao na hinooy pangitaan og sayop. Example lang ni Davao City Mayor Rodrigo Duterte kinsa maoy nagpa-asenso sa iyang dakbayan nagpaminos sa kriminalidad ug naghimo nga mauswagon pangitaan gihapon og sayop. Nakita naman nato giunsa sa mayor ang iyang dakbayan nga nawala ang mga drug pusher, mihapsay ug nalimpyo kay ang mga kriminal mahadlok sa balaod nga gipatuman sa ilang mayor pero daghan lang gihapon ang nanaway niya. Ako dili man supporter sa mayor kay dili mana siya taga Sugbo. (bobby.nalzaro@yahoo.com)