High value target prayoridad sa PDEA

BISAN sa pipila ka mga taho kaniadto nga dunay mga piniriso sa Cebu Provincial Detention and Rehabilitation Center (CPDRC), nga nagpadayon sa ilang negosyo sa illegal nga drugas sa gawas, way plano ang Phil. Drug Enforcement Agency (PDEA) 7, pagpahigayon karon og ronda sa prisohan.

Kini bisan paman usab ug di na mahimong mo-raid sa mga bilangguan ang PNP.

Matod ni PDEA 7 director Yo­gi Ruiz nga nakatutok ang ilang ahensiya karon sa pagsikop ug pagpiang sa drug operation sa mga high-value target, di lamang dinhi sa Sugbo kundi lakip na sa tibuok Central Visayas.

Di pa hinuon makakompirmar si Ruiz kon ang mga dagkong drug player nga anaa sa ilang listahan duna bay koneksiyon sa pipila ka mga piniriso sa CPDRC.

Sa nasayran, anaa sud sa provincial jail ang giila kaniadto nga number 1 drug personality sa probinsiya sa Sugbo nga si Alvaro Alvaro alyas Barok.

Bukas hinuon si Ruiz paghimo ug posibleng greyhound operation sa CPDRC apan iya pa kining tukion tali ni Gob. Hilario Davide III.

Sa laing bhahin, giangkon sa PDEA 7 nga nagkinahanglan silag tabang nunot sa tahas sa ilang ahensiya nga mao nay motutok sa suliran sa drugas.

Subay niini, gipadayag ni Ruiz nga bukas sila sa posibleng pinansiyal nga ayuda nga ihatag sa Cebu Provincial Anti-Drug Abuse Office (CPADAO) alang sa ilang mga operasyon ug insentibo sa higayon nga magmalampuson sila niini.

Una nang gipahibalo sa CPADAO ug mismo ni Davide nga posibleng mag-realign silag budget aron maoy isuporta sa mga operasyon sa PDEA7 human nga ahensiya nalang ang gitahasan pagpahigayon og mga anti-drug operation.

Gihangop kini ni Ruiz dungan sa pag-angkon nga nagkinahanglan og ayuda ang ilang ahensiya nunot sa kalapad sa ilang hurisdiksiyon nga gilangkuban sa mga dapit sa Central Visayas.

Gipaneguro hinuon niya nga bisan og way ayuda nga madawat gikan sa mga LGU, mopadayon sila sa ilang mandato nga mao ang pagsumpo sa suliran sa ilegal nga drugas.

Kahinumduman nga sa wa pa did-i ni Presidente Rodrigo Duterte ang PNP ug NBI pagpahigayon og mga anti-drug operation, ang CPADAO naghatagan og operational fund sa Cebu Provincial Police Office alang sa ilang mga operasyon ug kon magpalampuson kini mohatag sab silag insentibo sa mga pulis ug sa unit niini.

Sa laing bahin, gitug-an ni Ruiz nga wa pa hingpit nga mahuman ang validation nga gihimo sa ilang ahensiya sa mga barangay sa probinsiya nga una nang girekomendar nga himuong drug-cleared.

Matod niya nga di mahimong dali-dalion kini sanglit duna may mga lagda nga gitamdan aron pagtumbok kon hingpit nabang nalimpyo sa drugas ang usa ka dapit.

Subay sa anti-drug operation sa PDEA sa probinsiya, gipadayag ni Ruiz nga kanunayng gipahibawo sa iyang opisina ang gobernador ug ang CPADAO sa mga detalye may labot niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph