MOTAMBONG si Mayor Tomas Osmeña sa ipahigayon nga ground breaking sa ikatulong taytayan nga magdugtong sa dakbayan sa Sugbo ug lungsod sa Cordova.

Kini human giimbitar siya ni Secretary Adelino Sitoy kinsa maoy nagdumala sa Cordova sud sa taas nga panahon sa wa pa siya natudlo nga maapil sa gabinete ni Presidente Rodrigo Duterte.

Si Osmeña unang nipadayag nga di siya motambong sa pagsugod na sa katukoran sa P25 bilyones nga proyekto gikan sa private sector kon wa siyay klaro nga partisipasyon.

Apan nausab ang huna-huna sa mayor human adunay siyay katungdanan ug usa siya sa mamulong sa proyekto.

Lakip sa anaa sa programa mao si Secretary Michael Dino kinsa maoy sinaligan ni Duterte sa Visayas nga kontra ni Osmeña.

Gipadayag ni Osmeña kaniadto supak siya sa third bridge sanglit anaa na ang presensiya sa first ug second Mandaue-Mactan bridge ug pabor siya roll-on-roll off sanglit mga gagmay nga barko ra ang gamiton ug paghimo og tunnel sanglit iyang gipadayag nga makadaginot ang gobiyerno kay barato.

Apan iyang gibutyag nga niabot na ang proyekto ug way gasto ang Cebu City hinungdan nga wa siyay pagsupak sanglit iya kining gihulagway nga grasya nga niabot sa siyudad.

Matod niya nga wa siya makatugkad unsaon pagbawi sa investor sa third bridge sanglit aduna kini toll fee samtang ang laing duha ka bridge libre ra nga makaagi ang mga sakyanan.