Kung nakasayo lang ko, makasaksi unta ko.

Nag-abot sa komosyon ang mga fans sa Assumption Montessori School ug Sacred Heart atol sa ilang semifinals nga dula sa 11th Loyola Cup Basketball Tournament niadtong Domingo sa Xavier University Gymnasium.

Basi sa guard nga akong nahinabi, nagsugod ang komosyon kamulo pa ang dula nga gibana-bana nga anaa sa alas 2:55 sa hapon.

Wala kaayo ko nakakuha sa igong detalye kung unsay nasugdan sa komosyon apan kalit lang nikalayo ang mga supporters sa duha ka bando.

Matod sa mga referee ug sa committee, nagsugod sa linabayay og storya hangtod nagkasensitibo.

Nagtiwas pa sa gawas sa gym human sa 80-71 nga kadaogan sa Sacred Heart batok sa Assumption Jaguars.

Bana-bana sa guard nga nagpadayon ang ilang initay sa alas 3:46 sa hapon didto sa dalang Corrales Avenue, gawas sa gym.

Napugos ang guard pagtawag sa kapolisan sa Police Station 1 aron dili modako ang tensyon sa duha ka bando.

Taysa, di ba mao ni ang rason nga gituyo sa tigdumala sa Loyola Cup nga ang mga fans ug manan-away didto ra sa taas?

Sa akong nahibaw-an sa una, gituyo nila ang fans ug manan-away nga maplastar sa taas sa gym aron nga walay magkalayo sa tensyon.

Gani, magpasalamat ang tanan sa nagdumala sa liga kay gibalik nila nga ipalingkod ang manan-away sa ubos.

Mismo si Lynde Salgados, kinsa ang sports editor sa SunStar Cagayan de Oro, ang nihatag og suhistyon ngadto kang Arvin Martinez, ang tigdumala sa Loyola Cup, nga ibalik ang fans sa ubos.

Sa tinuod lang, bibo ang liga kung naa sa ubos duol sa korte. Apan, kung magkakomosyon lisod sab.

Madamay intawon kami nga manunulat nga didto na sab kami sa taas motan-aw ug layo sa scorebook.

Pandamay!