USA ang Land Transportation Franchising and Regulatory Board (LTFRB)-Northern Mindanao sa mitanyag og libreng sakay kagahapong adlawa atol sa nationwide transport strike nga gihimo sa mga nagkalain-laing transport group.

Gibutyag ni LTFRB Regional Director Allan Guro nga taliwala nga wala kaayo milakip sa hunong pasada ang dakbayan, nangandam gihapon sila pinaagi sa pagtanyag og libreng sakay sa katawhan nga ma-stranded.

Adunay unom ka bus ang ilang giandam alang sa mga stranded.

Sa laing bahin, ang kagamhanan usab sa probinsya sa Misamis Oriental naghatag usab og libreng sakay diin maglibot tuyok sa probinsya.

Duha ka mga multicab ang gipahimutang sa lungsod sa Opol, Misamis Oriental, laing multicab sab sa lungsod sa Tagoloan Misamis Oriental, PHO van sa Bulua Gym gipahimutang ug Grandia Van ang anaa gipahimutang diha likod sa kapitolyo.

Gibutyag ni Governor Yevgeny Emano nga 95 porsiyento sa iyang mga kawani ang mitambong sa flag raising ceremony ug niadtong mga empleyado nga wala nakatrabaho iya kining tagaan og memorandum aron pagpatubag kung unsay ilang rason nganong wala makatungha sa trabaho.

“Unfair pod sa uban natong mga kauban diri nga sayo kayo sila samtang ang uban wala. Sila na ang bahala sa pagpasabot kanako unsay ilang mga rason ug kung akong Makita nga tinoud pwede ra sab silang ma-excuse,” pasabot sa gobernador.

Namasahero gihapon

Namatikdan nga pipila lamang sa mga dyip ang mihunong og pasada ug labina lamang kadtong mga karaan na nga mga sakyanan nga maoy puntiryang i-phase out unta sunod tuig.

Matud ni Rommel Villarin driver sa Bugo Liner nga dili mahimo nga molakip sa transport strike tungod kay kung mohunong pasada daw sama ra sa gihunong ang adlaw-adlaw nga panginahanglan.

“Kung mohunong mi maam og pasada, ang pagkaon sa atong mga anak kada adlaw dili baya mahunong. Kinahanglan naa gyod tay madala pag-uli nato sa atong balay,” butyag niini sa SuperBalita.

Ang Pinagkaisang Samahan ng mga Tsuper at Operators Nationwide sa dakbayan ang igo lamang nagpahigayon og caravan lakip ang pagprotesta aron pagpaabot sa ilang yangongo sa buhatan sa LTFRB kagahapong adlawa. (SVB)