KATAPUSANG adlaw sa bulan. Ambot kung motuo mo sa istorya nga medyo kulang-kulang daw ang natawo sa Pebrero 28 ug 29?
Talagsaon ra ang matawo og Pebrero 29 kay kada-upat ka tuig ra mag-birthday. Walay gasto sa party ug regalo. Dugay sab matigulang.
Di ko motuo nga kulang-kulang ang mga natawo sa Pebrero. Sa akong pagsukit-sukit sa mga pasyente sa mental hospital, pipila ra ang natawo sa maong petsa sa Pebrero.
Mas daghan pa gani ang pasyente nga natawo sa Nobyembre nga dakong puruhan nahimong bunga sa ilang nag-uros-uros nga pagbati sa bulan sa gugma.
Daghan sab ang buang nga natawo sa bulan sa Septyembre nga bunga sa kasadya sa selebrasyon sa Pasko. Busa ayaw mo'g tuo nga buangon ang mga tawo nga natawo og Pebrero.
Kung buangon o salbahi ka, hinimuan ni nimo ug dili tungod sa bulan sa imong pag-anak o sa porma sa mga bituon sa langit.
Sa tinuoray lang, di pa matukib sa siyensya ang tukmang hinungdan sa pagkabuang sa tawo o mental illness. Ang nakita nila mao ang mga sintomas sa pagkaliso sa utok sa tawo.
Sa atong lindog sa Nota bene atong ginasaysay ang nasaksihan natong panghitabo sa mga tawo nga anaay problema sa pangutok. Diha sa may Cabantian, saksi sila dinha nga anaa sila si “Tarzan,” si "Boy Tindog" nga nagsige la'g tindog sa daplin sa dalan nga daw naglantaw sa unahan nga way nakit-an.
Anaa pod si "Manang Lingkod" nga nagsige la'g tungkawo sa kasagbutan daplin sa dalan ug nagyawyaw nga siya ra.
Sa among kabatan-on sa lungsod sa Padada, anaay iladong personalidad nga anaay problema sa pangisip. Naa didto si "Junior Buang" nga hangtud ron buang ra gihapon ug naglibot-suroy sa palengke.
Anaa si Matilde nga puwedeng himuon nga ungo sa pelikula. Si Larion nga nagpunay la'g lihok sa mga butang sa iyang palibot nga daw dunay gipangitang kayamanan.
Kung imong pangutan-on kung unsay spelling sa dog, awtomatik tubagon ka'g B-O-Y, boy!
Anaa pod si Pransing ug lain pa nga wa nako mahinumdomi ang pangalan tungod sa kadugay na.
Kamo diha sa probinsya maka-relate sab ani kay duna gyuy usa o duruha sa inyong mga silingan nga may ingon-niini nga balatian. Matud pa sa mga doktor nga daghan ang posibleng hinungdan niini.
Sakto si Presidente Rody sa pag-ingon nga ang pagkalulon sa ginadili sa druga dako nang hinungdan sa pagkabuang sa tawo.
Ingon nila sa pagsige'g gamit og druga nangamatay ang mga nerve cells sa utok nga gitawag sa uban nga “nauga nga utok.”
Sugid pa sa akong higala nga abogado nga nakatrabaho sa Guyana, South America nga tinuod diay ang ilang giingon nga didto sa Guyana matag kanto naay buang. Mora ni'g sa Iloilo nga kada pusod may ara pulis, kada pulis may pusod!
Ingon pa niya nga tungod sa grabeng paghitak sa ginadili nga droga nga gikan sa kasikbit nga nasud sa Colombia ug Brazil daghan ang naadik ug nagtulala na lang sa kadalanan sa maong nasud.
Unsa kahay tawag sa Pilipinas kung tanang kanto naay adik?
r