GISIGNIT sa Philippine Drug Enforcement Agency (PDEA)-Davao ang lima ka tawo nga nalambigit sa ilegal nga droga dinhi sa Davao Region.

Gilusad ang operasyon sa Agdao alas 2:45 sa hapon niadtong Pebrero 24 sa Beach Village, Barangay San Antonio, Agdao, Davao City.

Sa maong lugar nasikop si Brent Banaag, alyas Brent, 30, ulitawo, meat vendor ug residente sa lugar.

Si Banaag giposasan human gitunol ang shabu nga nagkantidad P500.00 sa ahente sa PDEA.

Nakuha gikan niya ang duha ka sachet sa shabu ug marked money.

Alas 6:20 sa hapon sa maong adlaw nasikop sab si Sonny Boy Anajao, 44, taxi driver, nagpuyo sa Block 4, Lot 3, Davao Farm, Barangay Lapu-Lapu, Agdao, Davao City.

Si Anajao nasikop pinaagi sa text sa usa ka concerned citizen nga namaligya siya og shabu mao nga gilusad ang drug bust operation.

Nakuha gikan niya ang shabu nga nagkantidad og P1,000.00.

Sa laing operasyon sa Panabo City sa maong adlaw, nasikop sab alas 11:35 sa gabii ang tulo ka mga tawo sa Barangay Sto. Niño.

Ang maong mga suspek naila nga sila Rolando Cruda, alyas Taba, Glenn Corvera ug Aileen Laurente kinsa nagkonsabo sa pagbaligya og shabu.

Silang tanan gipriso sa PDEA samtang gipaabot ang pagtaral sa ilang kaso sa korte. (APD)