MITABANG na ang Criminal Investigation and Detection Group (CIDG) sa Campo Crame sa pagpangita sa tulo ka mga kanhi opisyal sa Highway Patrol Group (MPG) 7 nga gilambigit sa pagbanhig-patay ni Atty. Noel Archival sa milabayng tuig sa lungsod sa Dalaguete.

Human nasubay nga mga sakop sa MGP 7 ang suspek sa salaud, ang mga suspek nga opisyal padayong nagtagotago.

Si Police Director Benjamin Magalong nga mibisita dinhi sa Sugbo  nisaad nga motabang sila sa manhunt operation nga gihimo sa iyang mga sakop sa CIDG-7 sanglit sila nagtuo nga wa na sa Central Visayas ang mga gipasanginlan.

Nagtuo si Magalong nga wa na dinhi sa Kabisayan-an  sila si Sr. Supt. Romualdo Iglesia kanhi hepe sa Highway Patrol Group-7, Sr. Insp. Joselito Lerion ug PO1 Alex Bacani.

Masaligon usab si Magalong nga sa umaabot nga mga adlaw motahan na sa ilang kaugalingon ang maong mga kanhi PNP official ug siya nagtuo nga gitun-an sa kampo sa mga akusado ang ilang mga lakang nga pagahimuon.

Gisalikway sa opisyal sa pulis ang pagduda nga naglisod ang kapulisan sa pagdakop sa mga gipasanginlan tungod kay susama ra sila nga pulis.

Matod ni Magalong nga dunay kamandoan ang korte pagdakop sa mga pulis ug andam nila kining buhaton ug ilang ipakisama sa ubang kriminal nga pinangita sa balaod.