NIKABAT og P241,5­­45,879.16 milyones ang gipagawas nga pundo sa kagamhanan sa lalawigan sa Sugbo alang sa nagkadaiyang mga proyekto sa kalungsuran ug mga dakbayan sa probinsya gikan sa niaging tuig hangtod sa Marso ning tuiga.

Ang pundo gigahin alang sa mga programa ug proyekto nga nalakip sa local development plans pinasubay sa Philippine Development Plan ug Medium-Term Public Investment Program.

Ang mga proyekto alang sa imprastruktura ang nakakuha og dako nga pahat sa pundo nga niabot og P171.268 milyones o 70.91 porsiyento sa kinatibuk-ang gahin.

Apil niini ang gahin alang sa pagpaayo sa mga karsada (P62.206 milyones), pagpatukod og mga edipisyo ug ubang estruktura (P74.991 milyones), pagpalambo sa water system (17.243 milyones), ug pagpasuga (P9.538 milyones).

Lakip usab sa pundo ang pagpalit og dagko nga mga ekipo nga dunay gahin nga P7.288 milyones.

Aduna usay gitagana nga pundo alang sa Environmental Protection and Risk Reduction nga maoy nakakuha sa ikaduhang labing dako nga pahat nga P36.679 milyones.

Aduna usay P22.671 milyones alang sa mga proyekto sa panglawas ug social services nga usa sa mga gihatagan og prayoridad ni Gobernador Hilario Davide III.

Apil sa pundo ang P2.878 milyones alang sa educational ug vocational training ug P8.05 milyones alang sa countryside development sama sa farm to market road ug livelihood ug training program alang sa mga mag-uuma.

Ang mga proyekto pinasubay sa Six Key Development Agenda ni Davide nga naglangkob sa health ug social services, edukasyon ug technical vocational training, environmental protection, climate change ug disaster risk management, infrastructure development ug turismo ug investment promotion, kalinaw ug kahusay.

Sa P241.545 milyones nga pundo, P182.06 milyones ang gikan sa buhatan sa gobernador ug P12.58 milyones sa Office of the Vice Governor ug P46.91 milyones sa Sangguniang Panlalawigan.