KAPIN sa 700 ka mga sakop sa Kamalayang Pilipino Movement (KPM) ang nipaluyo sa panawagan ni kanhi Chief Justice Renato Puno alang sa pag-usab sa 1987 Constitution pinaagi sa Constitutional Convention.
Pinangulohan ni Henry Tomalabcad, nasudnong presidente sa KPM, ilang gisaksihan ang nasudnong pagpamulong ni Puno didto sa San Andres Gym sa Manila nga gipasalida nga gidungan og salida live sa widescreen sa coference hall sa Cindeth, compound sa United Church of Christ in the Philippines sa Osmeña Boulevard.
Si Tomalabcad nagkanayon nga nationwide ang pagpasalida sa pagpamulong ni Puno ug sila ang nag-organisar dinhi sa Sugbo samtang lain usab didto sa Bohol, Sequijor ug Negros Oriental aron ipahibawo sa katawhan ang panawagan nga angayan na nga usbon ang pipila ka probisyon sa batakang balaod.
“It is no longer responsive to the needs of the Filipino people. We have to be a tuned to the modern times,” paghulagway ni Tomalabcad sa 1987 Constituion.
Ang KPM adunay mantra nga “ Isang Pinas” kinsa supak sa pag-umol og Bangsamoro Basic Law nga padayon nga gituki sa mga Kongreso.
Matod ni Tomalabcad nga nagtuo sila nga adunay maayong resulta ang pag-usab sa Batakang Balaod sama pananglit sa paghimo na sa Pilipinas nga parliamentary form of government diin ang executive ug legislative hiusahon samtang magpabilin ang judiciary.