DUHA ka mga lalake ang napalgang patay kagahapon sa managlahing lugar sa habagatang bahin sa Sugbo.

Usa ka giingong duna’y sakit nga patol nalumos sa dagat sa lungsod sa San Fernando, pasado alas 9:00 sa buntag kagahapon.

Patay si Jeffrey Geralde, 22, molupyo sa Barangay Balungag sa maong lungsod patay nang nakit-an sa iyang mga silingan nga naglutaw sa kadagatan sa dapit.

Matod ni PO3 Marjokim Misuari sa San Fernando Police nga alas 7:30 sa buntag dihang nibiya si Geralde sa panimalay sa iyang lolo nga si Elicio Geralde.

Ang silingan sa biktima nga sila si Victor Secretaria ug Manolit Sasuman mao ang unang nakakita sa lawas sa biktima nga naglutawlutaw sa kadagatan sa Barangay Sangat.

Giingon nga maligo ra unta ang biktima apan base sa imbestigasyon sa kapulisan nga posibleng giatake kini sa iyang patol samtang nilangoy hinungdan nga nalumos.

Dihang gihaw-as si Geralde gikan sa dagat, wala na kini vital signs.

Dihang gisuwayan unta kini pagdala sa tambalanan, wala misugot ang kaparyentehan niini ug gidala kini pagbalik sa ilaha.

Samtang patay usab si Dondon Alicante dihang napalgan sa kilid sa dalan sa Barangay Inuboran, dakbayan sa Naga, pasado ala 1:00 sa kaadlawn kagahapon.

Matod ni PO1 Jeremias Caballero sa Naga Police Station nga gisuwayan pa og dala sa Minglanilla District Hopital ang maong biktima apan gideklarar kini nga dead-on-arrival.

Si Alicante kinsa usa ka molupyo sa Sitio Balili, Barangay Tinaan wala’y samad sa iyang kalawasan.

Padayon pa ang imbestigasyon sa kapulisan sa maong panghitabo ug sa rason sa iyang kamatayon.