MIABOT og 564 ka mga piniriso sa Cebu Provincial Detention and Rehabilitation Center ang nagparehistro isip bag-ong mga botante sa siyudad sa Sugbo alang sa umaabot nga piniliay sa sunod tuig.

Sila ang nipahimulos sa usa ka adlaw nga off-site registration nga gipahigayon sa Commission on Elections sa pacilidad niadtong Biyernes.

Kini nagpasabot rehis­trado nga mga botante na sila karon sa Barangay Ka­lunasan ug mahimo na sila makabotar sa mga kandidato nga magpapili sa pagka mayor, bise mayor, kongresista ug mga konsehal sa habagatang distrito sa dakbayan sa Sugbo sa nagsingabot nga eleksyon.

Si Cebu Provincial Election Supervisor Lionel Marco Castillano nii­ngon ang off-site registration gipahigayon sa CPDRC aron mahatagan og higayon ang mga bilanggo nga makaparehistro ug magpakuha og biometrics alang niadtong wala pay biometrics.

Ubos sa balaod, kadto lang makonbikto sa kaso nga adunay sobra sa usa ka tuig nga silot sa pagkapriso ang masuspenso ang katungod sa pagbotar sa piniliay.

Sa off-site registration, mahimo usab mobalhin og rehistro ang mga piniriso gikan sa ilang kanhi rehistro sa wa pa sila mabilanggo.

Si Castillano nagka­nayon ila pang subayon kon pila ang bag-ong nagparehistro ug kon pila ang nibalhin og rehistro.

Upat ka buwan na lang kapin ang nahibilin sa dili pa matapos ang pagpangrehistro sa Comelec.

Matod niya kutob na lang karong Oktubre 31 ang pagdawat og registration sa mga botante.

Sa kasamtangan, ka­pin pa sa 147,000 ka mga botante ang wa pay biometrics ug peligro nga dili makabotar sa umaabot nga 2016 presidential ug local elections.

Tinguha ni Castillano nga 70,000 sa maong gidaghanon ang marehistro o magpa-biometrics sa dili pa mapupos ang tagal.

Ang Sugbo adunay kinatibuk-ang 2.5 milyones ka mga botante, wala pay labot niini ang way mga biometrics.

Sa tibuok Pilipinas, kapin sa 4 milyones ka mga botante ang wa pay biometrics.

Si Castillano nidugang nga hayan sa 147,000 ka mga botante ang uban niini nangamatay na, nibalhin og rehistro o wala na matultoli ang ilang nahimutangan.

Si Comelec Commissioner Louie Tito Guia niawhag sa mga botante nga moadto na sa labing duol nga buhatan sa Comelec nga magparehistro o magpa-biometrics ug pahimuslan ang higayon nga sila makabotar.

Siya ang nangulo sa off-site registration sa CPDRC.

Si Guia, ang commissioner in-charge sa registration sa mga gitawag nga vulnerable sector sa­ma sa mga piniriso, persons with disability, indigents ug senior citizens.

Siya nidugang nga gipaningkamotan sa Comelec nga makapa-biometrics ang mga botante pinaagi sa ilang satellite registration diin ang mga kawani sa ilang buhatan ang mo­adto mismo sa lugar aron makuhaan og biometrics ang uban.