BISAN mao pa la’y iyang pagbalik gikan sa pagkasakit, nagbangis ra gihapon si LeBron James ug nakapakatap kini’g 24 puntos aron tabangan ang host Cleveland Cavaliers sa pagpukan sa Milwaukee Bucks, 102-95, kagahapon sa National Basketball Association (NBA).

Ang four-time MVP wala nakapakita og aksyon sa miaging duwa sa Cavaliers gumikan kay nagsakit ang tutunlan niini.

Sa iyang paghiabot sa Quicken Loans Arena, si James kuwestiyunable pa’ng makaduwa apan human sa workout, nasuta nga andam nang mobalik og duwa ang gitawag og “King.”

Pagsugod pa lang sa duwa, nagpakita dayon og maayong labok si James, mihansak kini ug nakahagpat pa og foul gikan kang John Henson.

Dili man tuod 100 percent ang kondisyon ni James apan gipakita niini nga kaya gihapon niyang makadominar.

“He brings so much to our team,” batbat ni Cavaliers coach Tyronn Lue kabahin kang James. “He’s just a winner. Anybody who goes to the Finals six straight times is a winner. He just makes everybody better, myself included. ... That’s who he is. We needed his juice tonight.”

Gikan sa usa lang ka puntos nga labaw sa 4th quarter, ang Cavaliers nakamugna og 11-0 run nga gipangulohan sa hansak ug kompletong three-point play ni James aron ablihan og dako ang ilang pultahan paingon sa kadaugan.

“I felt good enough to lace them up,” matod ni James.

Ang Cavaliers gipangulohan ni Kyrie Irving pinaagi sa iyang 25 puntos, nidugang og 14 puntos si Derrick Williams samtang nitampo og 13 puntos si Kyle Korver.

Ang Bucks gipangulohan ni Malcolm Brogdon pinaagi sa iyang 20 puntos.

Aduna pa’y laing tulo ka mga magduduwa ang Bucks nga nakamugna og double-digit nga puntos apan ang ilang All-Star nga si Giannis Antetokounmpo igo lang nakaamot og siyam ka mga puntos. AP&ESL