HINUNANGAN, SOUTHERN LEYTE - Gipro­testahan sa gatusan ka mga tinun-an sa Hinunangan National High School ang ilang prinsipal tungod sa alegasyong kurapsyon ug abuso sa gahom. Ang protesta gilusad sa miaging adlaw uban sa Supreme Student Government (SSG) sud ug gawas sa tunghaan. Ang mga tinun-an nga naka ibilyan ug nag-uniporme nagdala og placards ug trumpa aron gamiton pagpadangat sa ilang tingog.Nakasuwat sa ilang placards ang pulong nga ‘Hawa na!’, ‘Way Batasan’ ug ‘Say No To Corruption’. Gipalanog nila ang pulong nga ‘We Want Change, Hawa Na!’. Sa paghimo ning balita, wa pa mohatag sa iyang habig ang prinsipal. Nahinabi sa Superbalita Cebu si Department of Education - Southern Leyte Division, Assistant Schools Division Superintendent Jun Cadayona ug nisugilon nga mosusi sa tunghaan ang ilang School Governance and Operation Division ug legal officer tungod sa hitabo. Wa pay giisyu nga official statement ang DepEd Southern Leyte Division bahin sa insidente.