SUPAK si Mayor Tomas Osmeña sa tinguha sa Land Trans­portation Franchising and Regulatory Board (LTFRB) nga wagtangon ang mga public utility jeepney nga nag-edad og 15 anyos pataas.

Ang pamahayag sa mayor iyang giluwatan usa ka adlaw human nipahigayon og transport strike ang grupong Piston aron supakon ang tinguha sa LTFRB.

Si Osmeña nagkanayon nga wala makahatag ug makamugna og hulga sa panglawas ug problema sa trapiko ang karaan nga mga PUJ.

Matod niya nga wala na siya makahinumdom sa katapusan niyang higayon nga nakakita og PUJ nga nagub-an atol sa ilang pagbiyahe.

“I cannot even remember the last time I saw a jeepney breaking down. If it’s not broken, why fix it?” matod ni Osmeña.

Gipadayag sa mayor nga adunay mga tawo nga nagsalig lang sa teyorya ug ang ilang panglantaw didto sa Manila dili mahimong ipatuman dinhi sa Sugbo.

Gipasabot niya nga kon ipatuman pa ang maong proyekto, makasamot kini og hatag og problema sa mga tawo.

Kini gumikan sa nag-ung-ong nga implementasyon sa Bus Rapid Transit sa dakbayan diin adunay mga rota sa PUJ ug mga de pasaheroan nga maapektuhan.

Sa laing bahin, uyon si Osmeña sa operasyon sa habalhabal sa pipila ka mga lugar sa dakbayan sa Sugbo apan iyang giangkon nga kinahanglan kini nga i-regualte.

Giangkon sa mayor nga lisod wagtangon ang habalhabal sa dakbayan sanglit mao na kini ang gikuhaan og panginabuhian sa libuan ka mga drivers.

Gumikan niini, nagplano si Osmeña nga iyang himoan og terminal nga adto niya ibutang sa unang andana sa Lahug public market ug laing usa sa baranga Apas.

Matod sa mayor nga sa maong paagi, mokusog usab ang halin sa public market. Sa Apas aduna nay nihatag og proposal kalabot niini.