MOABOT sa 29 ka mga pagpangsuyak ang natigayon sa dakbayan sa Cagayan de Oro atol sa gipahigayon nga nationwide transport strike niadtong adlaw'ng Lunes, Pebrero 27.

Kini ang gikumpirma ni Police Regional Office-Northern Mindanao spokesperson Lemuel Gonda kinsa niingon nga sa tibuok Northern Mindanao walay nakapadangat og report kalabot sa mga insidente nga nahitabo.

Ang Cagayan de Oro City Police Office lamang ang nagpadangat og report nga adunay mga nahitabong pagpangsuyak.

Adunay 29 ka kaso diin 14 ka mga taxi ang nasuyakan, pito sa mga motorsiklo, ug walo gikan sa mga pribadong mga sakyanan.

Hinuon gibutyag niini nga mapasalamaton lamang siya kay sa nahitabong pagpangsuyak, walay aksidente nga nahitabo ug malinawon ang transport strike sa rehiyon tungod kay dili gayud tanan nga mga publikong sakyanan ang mihunong pasada ug caravan lamang ang gihimo.

Si Joel Gabatan, kinsa chairman sa National Confederation of Transport Workers Union Northern Mindanao, nihimakak nga sila ang mihimo sa mga pagpanuyak nga nahitabo atol sa transport strike tungod kay gamay lamang sila ug daan na nilang gisabutan kauban ang pila ka mga transport group nga likayan ang pagpang harass sa mga driver ug lakip na gayod kining pagpanuyak.

Dugang usab niini nga posibleng gisakyan sa uban nga grupo ang strike ug sila maoy nanglabay og suyak sa kadalanan.

Gipaabot sab sa transport group nga malampuson ang ilang pagpahigayon sa strike gumikan kay 70 porsiyento ang pagkabalda sa biyahe tungod sa hunong pasada.