USA ka sakop sa scout platoon ang nakabsan sa kinabuhi human sa engkwentro niadtong Lunes, Pebrero 27, alas 9 sa buntag sa Barangay Kaulayanan, dakbayan sa Sugbongcogon, Misamis Oriental.
Giila ang biktima nga si Private Oshin Rosala sakop sa 58th Infantry Battalion (IB) 4th Infantry Division (4ID)-Philippine Army ug residente sa Napaliran, dakbayan sa Balingasag, Misamis Oriental.
Sa report nga gipaabot gikan ni 58th IB spokesperson Janelle Diaz, nasayran nga nipahigayon og combat operation ang mga kasundalohan lakip si Rosala dihang ilang naagbat ang mokabat 30 ka mga sakop sa New People’s Army (NPA) ubos sa Guerilla Front 4B.
Dinhi nahitabo ang pagbinayloay og bala sa duha ka parte nga miresulta sa kamatayon ni Rosala.
Taliwala adunay nakalas nga kinabuhi, nabawi sa mga sundalo ang gikampohan sa mga NPA tungod kay ilang nakuha ang mga nahabilin nga mga gamit lakip ilang mga pagkaon.
Gidudahan sab sa kampo sa mga sundalo nga adunay nakalas nga kinabuhi sa parte sa NPA tungod sa mga marka sa dugo nga nakita sa nahitaboan.
Gikasubo ug gikondena sa dako sa 4ID ang maong insidente tungod kay daw nagpasabot lamang kini nga wala gayud sa huna-huna sa mga walhong pundok nga makab-ot ang kalinaw denhi sa nasod.
Gipaabot sab sa mga kasundalohan sa walhong pundok nga andam silang modawat sa mga bout mosurender aron mobalik sa sabakan sa gobyerno.
Peace talk
USA ang Iglesia Filipina Independente ubos ni Archbishop Felixberto Calang ang gapaabot nga andam siya nga hisgotan ang hisgotanan nga pangkalinaw batok sa mga NPA aron mahunong na kining mga pagpangatake ug mga engkwentro diha sa kabukiran.
Sa iyang bahin sab ni Misamis Oriental Governor Yevgeny Emano gibutyag niini nga gikasubo niya og dako ang engkwentro nga natigayon sulod sa iyang probinsya apan gipasabot niining wala siyay control sa padayon nga pagukod sa gobyerno sa mga walhong grupo.
Hinoun malaumon kini nga adunay mahitabong peace negotiation aron mahunong na kining mga matigayon nga engkwentro.