NAGLASONG ang usa ka lalaki human naisahan sa sex worker niadtong Martes, Pebrero 28, alas 4:26 sa kaadlawon sulod sa usa ka motel sa Rizal/Cruz Taal Streets, dakbayan sa Cagayan de Oro.

Gidala sa kapolisan ngadto sa Police Station 1 sa Divisoria si Warren (bansagon gitago) kinsa samaran human kini naglasong.

Sa pakighinabi sa SunStar SuperBalita kang Warren, giangkon niini nga naka-inom siya ug naglagot human nga nailad sa sex worker.

“Giilad ko sa girl. Oo naka-inom ko, basta giilad ko, never mind,” ang mubo nga pahayag niini.

Wala na usab giangkon niini kon unsa ang hinungdan ug sa unsa nga pamaagi nga giilad kini apan pagtuo sa kapolisan nga posibleng wala niini nakuha ang gusto ug wala magkasinabot ilabi na sa lawasnong kalipay.

Nasayran nga girespondehan sa kapolisan ang nahitabong kumosiyon sulod sa motel human nakig-check in kauban ang wala mailang babaye ug gipangguba ang mga glass sa establistamento, hinungdan na usab nga nakaangkon kini og mga samad kinsa dali usab nga gidala sa Northern Mindanao Medical Center aron nga mapatambalan.

Sa pagkakaron, ang suspetsado ang kasamtangang anaa sa Police Station 1 alang sa tukmang disposisyon kinsa buot nga pabayaron sa management sa motel og P40 mil.