GIPUSIL-PATAY ang usa ka lalaki kinsa mitabang pa og dayong sa lungon sa paghatud sa iyang ig-agaw nga namatay sa Lubogan Public Cemetery, alas 4:30 Martes sa hapon sa Toril District, dakbayan sa Davao.
Ang biktima nailhang si Rodrigo Babayson Villegas, 33, minyo, doormat vendor, residente sa Purok 4, Barangay Lubogan.
Sa impormasyon nga nakalap sa SunStar SuperBalita ug sa dxGM Super Radyo Davao, nasayran nga mitabang og alsa sa lungon sa namatay niyang ig-agaw ang biktima aron nga itunod na sa pantyon.
Apan duha ka mga wala mailhing lalaki ang nagpaaron-ingnon nga nagdagkot og kandila, samtang laing usa ang nagpa-atik-atik og dayong sa lungon maoy mipusil sa biktima.
Human milanog ang mga buto sa pusil, nahagba ang biktima kilid sa pantyon ug gibuhian sa mga kauban ang gidayongan nga lungon hinungdan nga nadakdak kaniya.
Samtang ang ubang mga tawo nga mihatud sa lubong nagkatibulaag og panagan.
Ang Toril Police Station padayong naghimo og imbestigasyon sa hitabo aron masayran ang motibo sa pagpamusil samtang ang patay nga lawas sa biktima anaa na sa usa ka punerarya sa Toril ning dakbayan.