NAGBAHA ang mga utanon ug prutas sa agro-fair nga gisalmutan sa 13 ka mga bukirang barangay sa dakbayan sa Sugbo.
Kini bisan pa sa di maayong epekto sa El Niño ngadto sa kaumahan sa kabukiran.
Bisan pa niini, sila nagpadayon sa pag-ani sa mga abot.
Si Elji Marces, usa ka mag-uuma, niingon nga nakakuha siya og tinubdan sa tubig aron ikabubo sa iyang mga tanom.
Nikawot siya og lungag sa sapa sa barangay aron makatigom og tubig ug nikonektar og hose gikan sa tinubdan padung sa iyang uma aron ikabisibis.
Sa normal nga mga adlaw, makapamubo siya makausa matag adlaw, apan karon kay nihit na ang tubig, makatulo na lang sa usa ka semana niya gihimo.
“Siguraduon lang gyod namo nga sakto ang pagpamubo namo sa tanom kay ka-tulo naman lang unya gibutangan sad gyod namo ug natural fertilizer,” siya nagkanayon.
Ang mild El Niño gipaabot nga molanat hangtod pa sa sunod tuig.
Si Marces sa Barangay Sirao, usa sa mga mag-uuma nga misalmot sa Pahugyaw sa Kabukiran 2015 sa Brgy. Malubog.
Matod ni Association of Barangay Councils (ABC) President Philip Zafra nga ang Pahugyaw sa Kabukiran gitumong aron pag-promote sa eco-tourism sa mountain barangays.
“There’s more to discover in Cebu City and through the cooperation of the 31 mountain barangays, residents in the lowland will know that we have tourists attractions in the area,” siya nagkanayon. Sun.Star Cebu