DUNA pay paglaum ang Teleperformance nga makuha ang titulo human gipildi ang IQor, 73-53, sa Game 2 aron matabla ang serye ngadto sa 1-1 sa Davao Call Center Basketball League (DCCBL) best-of-three finals series.

Si Adolf Gemarino maoy nangulo sa Teleperformance human mihimo og 21 puntos lakip ang 12 sa ikaduhang quarter samtang si Dave Cadano mihatag og 11.

Si Winston Braza miiskor og team-high 15 alang IQor sa maong duwa nga gihimo sa Gaisano Grand Citimall SkyGym.

Si IQor nindot ang dinulaan sa unang quarter batok Teleperformance, 13-7, apan pag-abot sa sunod nga tulo ka kanto nabigwasan na sila sa Teleperformance pagsugod sa ikaduhang kanto sa pagpanguna ni Gemarino.

Si Teleperformance head coach Mark Xavier de Guzman miingon sa interbyu nga kinahanglan nilang ikontrol ang tempo sa duwa.

"What we need to do is to pressure them and at the same time impose our run-and-gun play. If we continue to convert on transition fast breaks, the game is ours," ni de Guzman pa.

Dugang niya nga mas paningkamutan pa nila ang dula sa Game 3.

Samtang sa bahin ni Braza, sa laing interbyu, siya nagkanayon nga ang ilang tim naglisud human nawala na ang ilang star player Nash Ignacio kinsa anaa na karon sa Cebu.

Niya pa nga kinahanglan nila magbag-o og lineup ug mangita og unsay maayong rotation nga mahimong mas epektibo.

Ang final showdown himuon karong adlawa sa parehong venue.(Ruji Peter S. Abat)