DAVAO DEL NORTE -- Usa ka inahan ang gidali pagdala sa balay tambalan human maigo sa pagpamusil sa wala masayring mga suspetsado nga nagsakay og motor nga miagi sa ilang balay samang sila nangatulog.

Nahitabo ang insidente sa alas 12:01 sa buntag kagahapon didto sa Purok San Isidro, Pagsabangan, Dakbayan sa Tagum.

Hinuon sa alas 8 sa buntag kagahapon, Sabado, gideklara nga luwas na ang biktima nga gi-ila nga si Dinah Pandacan Montilla.

Sa blotter sa Tagum City Police Station, nasayran nga kalit lang nakadungog ang pamilya sa biktima og buto sa armas sa dihang dunay miagi sa ilang balay nga nagsakay og motorsiklo.

Nasayran nga ang balay sa biktima anaa lang sa kilid sa national highway sa maong dapit.

Apan nakurat ang pamilya sa dihang aduna'y samad sa ulo ni Montilla ug nagkadugo na.

Dali nilang gidala si Montilla sa usa ka tambalanan sa dakbayan aron nga patambalanan.

Sa gihimong imbestigasyon sa kapulisan sa balay sa biktima, wa sila'y makitang basiyo sa bala sa armas nga nakaigo kang Montilla.

Gikatahong padung sa Lungsod sa Asuncion ang mga nakamotor nga mi-agi sa balay sa biktima nga nagpabuto.

Padayon nga giimbestigahan sa otoridad ang hitabo kon ang pamilyang Montilla ba gyud ang punting sa mga nakasakay og motor niadtong higayona.(Domilyn Ramos Pico)