NAGPANGAGOT sa kalagot ang usa ka dalaga kinsa midangop sa San Pedro Police Station human giayo'g himas ang iyang batiis sa iyang katapad nga hubog nga pasahero alas 9:00 sa gabii niadtong Biyernes.
Usa ka alyas Marissa, taga Talomo District ang midangop sa Women and Childrens Protection Desk (WCPD) aron isumbong sa pulis nga gihimas ang iyang batiis sa iyang tupad sa dyip.
Sa impormasyon nga nakalap sa Sun.Star Superbalita gikan sa presinto dos nasayran nga misakay og dyip si Marissa gikan kanto Matina Crossing, McArthur Highway padung Claro M. Recto Street.
Gi-ingon nga nakurat siya pag-abot sa dalang Magallanes human misakay ang usa ka lalaki kinsa nagpangedaron og 65-anyos nga lango sa ilimnong makahubog.
Mitupad kaniya ang hubog ug gi-ingon nga giayo og himas ang iyang batiis diin sa iyang kalagot nasagpaan niya ang tiguwang ug misiyagit nga ihunong ang dyip.
Dihang mihunong na ang dyip, mikaratil og dagan ang tiguwang padung sa Anda Street kinsa wa na makita ug igo na lang gipatala sa dalaga ang maong insidente ngadto sa pulis.(Jeepy P.Compio)