DAVAO DEL NORTE -- Gibalhog sa selda sa Tagum City Police Station ang mag-amahan ug lain pang usa human madakpi sa kapulisan pinaagi sa gahum sa warrant of arrest.

Nadakpan ang tulo niadtong Sabado, sa Purok 3 Rattan, Apokon, Dakbayan sa Tagum.

Mga nadakpan naila nga sila si Nandicito Mantilla Sr., ang anak niini nga si John Mark Mantilla ug ang igsuon sa iyang asawa nga si Mercidita Yap, mga molupyo sa maong dapit.

Sumala pa nga gidakop ang mga nahisgutan subay sa warrant of arrest nga gipagawas ni Judge Teodulfo L. Vega sa Municipal Trial Court in Cities (MTCC) sa Tagum City gumikan sa kasong direct assault and attempted homicide nga nakadoket sa criminal case no. 30604-15.

Lain pang duha ka mga anak ni Nandicito ang nalakip sa warrant apan wala niadtong tungura sa dihang gihimo ang operasyon sa kapulisan.

Nasayran nga niadtong milabay nga tuig, gi-akusahan ang mga dinakpan nga nagtabang og kulata sa purok lider kinsa wala giila sa mga otoridad.

"Nangyari kasi yan, last year pa. Na-demolish sila tapos yung purok lider, kasama ng sheriff during the demolition. Per accusation, binuweltahan nila ang purok leader pagkatapos. Hinulog nila sa kanal. Bugbog sarado, di nakakain ng ilang araw," pagsumada ni Police Chief Inspector Francis Sonza, hepe sa Criminal Investigation and Detection Group sa Davao del Norte.

Apan mga dinakpan milimod nga nanulong sila sa balay sa purok lider. Miagi matud pa sa ilang balay ang purok lider nga nagmotor, gipara kini ni Mantilla Sr. aron istoryahon, apan imbis mohunong, gisipa siya sa tiyan.

Nagmulo usab ang pamilya sa dinakpan nganong han-ay sa CIDG gayud ang miaresto kanila.

"May warrant of arrest po kasi sa kanila. The Arrest of person with warrant, ay kasali din ng trabaho natin," esplikar ni Sonza.