GILAMPORNAS ang Philippine team sa mas dagko ug baskog nga Russian squad, 21-9, sa 2015 FIBA U18 World championships didto sa Hungary.

Ang kapildihan maoy nagpapas sa paglaom sa Pi­­­lipinas nga makasulod sa quarter finals knockout stage kagahapon sa buntag.

Bisan pa man og na­bintahaan sa gidak-on, wa moisa og dali sa ilang banderang puti ang mga Pinoys ug hugot kining mikombati. Apan gilupig lang gyud sila sa linayatay sa mga Russians ug wa usab mangigo ang ilang mga itsa sa gawas.

Miulbo ang gamayng tension sa duwa sa dihang ang usa sa mga Russians ang nanumbag apan sa dakong kahibulong wala kini ma thrown out.

Hinuon nahusay ra usab ang gamayng kaguliyang. Wa makapakita og arte si Kobe Paras nga daw matabonan sa gidak-on sa mga Russians. Napahimuslan usab sa Russians ang ka pugdol sa mga itsa sa mga Pinoy ug dali kining nakaposte og 6-0 nga labaw.