ANG pagkutlo sa ikatulong kada­ugan sukad sa iyang paghibalik og saka ibabaw sa ring maoy anaa karon sa alim­patakan ni kanhi world champion ug top-rated featherweight contender nga si Marvin Sonsona sa dihang ikasangka sa 10-round fight si Jonathan Arrellano didto sa StubHub Center sa Carson, California.

Sa weigh-in kagahapon, si Sonsona (19-1-1) sa General Santos City, mipatong sa weighing scale nga may 127.6 lbs samtang 128 lbs. ang kang Arrellano (15-5-2, 3KOs).

Dili sayon alang ni Sonsona si Arrellano sanglit ang 27 anyos nga taga Ontario, California ang impresibo sa iyang mga uwahing away ug wa pa gyud kini makatilaw og knockout sa iyang unom na ka tuig nga boxing career.

Si Sampson Lewkowicz, kinsa mao usab karon ang naggiya sa 24-anyos nga Sonsona, mitug-an nga kon mag­lam­puson ang Filipino fighter ning away laing 10-round title fight ang nakahan-ay na alang sa kanhi WBO junior bantamweight titleholder karong September.

Human niini, posibling hikayon na usab ang laing title fight.

“First of all, we have a fight with a tough fighter on Saturday. I strongly believe it’ll be a short one,” nagkanayon si Lewkowicz.

Si Sonsona atoa na karon nagbasehan sa Las Vegas sukad niadtong Pebrero ning tuiga ug anaa mag-training sa Roy Jones Boxing Gym uban sa iyang trainer nga si Jhun Agrabio.

Kauban usab nila si Angel “Memo” Heredia, kinsa kausa ka higayon maoy nagtabang sa preparasyon sa uwahing away ni Juan Manuel Marquez diin iyang gi-knockout sa Manny Pacquiao sa ilang ikaupat nga panagsangka.

Si Sonsona adunay gibug-atong nga 168 pounds sa iyang paghiabot sa Las Vegas.