HELLO, mga sis ug bro! Grasya sa Ginoo nga managkauban gihapon kita karong bulan sa Marso. Pipila baya sa mga binuhat ni Lord gisugdan na og kitkit sa mga ulod, migo, mao magmaya kita sa gininhawa nato.
Wala pa gayud ko ka-get over sa mga "bakak" nga hisgutanan kay adlaw-adlaw mao man god ang kasagaran natong masinatian. Di ba ang mga senador natong mga halangdon nagkanayon nga tinuod lang ang ilang gipang-ingon?
Unya unsaon man kana nga ang mga testimonya tag duha man ang bersiyon? Nagpamatuod kini nga anaa gayud kanila ang bakakon! Ngilngig kaayong hunahunaon, miga, nga ang mga angayang makigbisog sa kamatuoran mao na hinuon ang daw nayawaan tungod sa personal nilang interes nga ginabisugan.
Terible kini nga komunidad diin kung kinsa ang daghang kaila ug hawod makakuha og simpatiya sa masa mao nay matinud-anon.
Sa pagkatinuod, nalipay ko nga nabilanggo na si Senador Leila De Lima, dili tungod naglagot ko niya apan usa siya sa mga dili maayong ehemplo sa mga Pilipina.
Dili ko balaan ug wala koy katungod manghusga apan naglisud lang gayud ko'g salig ni De Lima tungod sa mga bakak nga gibungat niya.
Una sa relasyon nila ni Ronnie Dayan nga iyang driver kaniadto ug sa pagpanglimbong niya sa gobyerno sa dihang imbestigahan si Dayan aron masuta ang kamatuoran- iya na hinuon kining gipadagan.
Kitang tanan adunay kahuyang ug kung magpaubos kita'g mangayo og pasaylo, sabton man siguro kita sa mga nagsalig kanato.
Sukwahi kini sa gawi ni De Lima kay mas nagmagahi pa siya dala pag-inartista kay sa mga interview-nagdrama. Sakto ba kana nga gawi sa giboto ug naglingkod sa Senado?
Di ba matawag nato og pagpang-abuso kini sa gahum niya, migo? Ambot, tubaga daw ko ninyo.
Sa mga nagkadaiyang tulunghaan ug buhatan sa gobyerno, nakataplak sa bungbong kanang panultihon nga, "Honesty is the Best Policy." Ang pangutana nako, tinuod pa ba kaha kini? Pinakanindot ba gayud nga polisiya ang pagkamatinud-anon o "just" o simpleng polisiya na lang, igsuon?
Lisud man god kung ang atong mga pulong nga buhian kadto lamang kombinyente sa sitwasiyon nato, inahan kay dili na kita matuohan. Masakripisyo ang kredibilidad sa atong trabaho ug pagkatawo mismo kung puro na bakakon ang henerasyon karon ug sa umaabot, igsuon.
Nindot siguro nga magtuon kita'g sala sa mga pulong nga atong mabati aron ang desisyon nato dili masagulan og hiniwi. Kung masipyat- angkunon unya sugod na pod kita'g bangon aron ang kinabuhi nato mahimong maayo ug malinawon.
Atong ikinabuhi ang pagkamitunod-anon kay karakter kini sa Diyos ug ikalipay Niya nga moanggid ang atong pamatasan Kaniya.