UNSAON pagbuhi sa usa ka inahan nga gradwado lamang sa high school sa iyang lima ka mga anak kon wala na siyay katimbang sa kinabuhi?
Kini ang akong pangutana sa akong kaugalingon kaniadto. Karon, ang akong ikatubag niini mao ang “pagpaningkamot, pagkugi, ug giya gikan sa Ginuo.”
Ako diay si Pricilla Noval, 58, taga Sitio Patabog, Brgy Union, lungsod sa San Francisco sa isla sa Camotes, Sugbo. Usa ako ka balo ug nagbinugtong nga nagmatuto sa akong lima ka mga anak. Bisan pa sa kalisud nga akong naagian, mapasigarbuhon kong moingon nga napatiwas nako og paeskwela ang tanan kong mga anak pinaagi sa negosyo sa banig.
Manghimo ko ug mopalit og banig gikan sa akong mga silingan ug akong ilabang ug itumod sa habagatan hangtud amihanang bahin sa Sugbo. Kon dili paliton tanan sa akong mga suking tindahan ang mga banig, dili ko makauli anang adlawa sa amo kay ako man mismo maoy mosuroy sa mga nahibiling banig sa mga barangay. Dili ko mobalik sa Camotes hangtud dili mahurot ang mga banig, kay nagpaabot sab ang akong mga silingan sa halin sa ilang mga banig kay aron ako silang kabayran. Sagad sa pantalan sa Siyudad sa Danao ko magpalabay sa kagabhion aron inigkaugma ilibod ang wala nahalin nga mga banig. Kung problema ang dili mahurot og baligya nga mga banig, usahay problema sab kon ting-uwan kay nihit ang banig o dili mauga ang banig.
Ang kinadag-ang problema nga akong nasugatan mao kadtong gisunog sa wa mailhing tawo ang halos tanan namong tanom nga soli-soli (buhaton nga banig). Mora’g nahugno ang akong kalibotan niadtong panahona. Maayo nalang gani kay may nahabiling semilya sa soli-soli nga wala masunog ug amo kining gitanom pag usab. Buotan gayod kaayo ang Ginuo kay sa wala damha dali rang nitubo ang among gitanom.
Uban sa gipahulam kanako nga kantidad sa micro-finance nga programa sa Ramon Aboitiz Foundation Inc., akong napabangon pag-usab ang akong negosyo, nga mao say hinungdan nganong napahuman nako sa pag-eskuyla ang akong mga anak ug napausab nako ang among panimalay gikan sa amakan ang bongbong ngadto na sa konkreto.
Ang akong ikasawo sa mga sama nako nga nanay nga naningkamot alang sa pamilya mao nga kanunay maningkamot, dili magtinapolan, kakugi maoy ipatigbabaw. Labaw sa tanan, kanunay mag-ampo sa Ginoo; gahinan og oras ang Ginoo ug ang pamilya aron kanunay madasigon batok sa bisan unsang pagsulay.