POSIBLENG sunod semana ideklara na sa Philippine Atmospheric, Geophysical and Astronomical Services Administration (Pagasa) ang pagsugod sa panahon sa ting-ulan.
Pipila usab ka bulan nga nakasinati og labihan ka init dili lamang ang Dakbayan sa Cagayan de Oro, mas grabe pa gani sa ubang mga dapit sa nasud.
Minilyon ang mga produktong agrikultura ang nangadaot tungod sa labihan ka init sa panahon ug pipila usab ka mga dapit ang gipa-ubos sa state of calamity.
Ning ulahing mga semana, ang Dakbayan sa Cagayan de Oro nakasinati og sunod-sunod nga pag-ulan. Moabot lang hinuon ngadto sa usa o duha ka oras nga pag-ulan apan dako na kayo kini og tabang labi na bukiran nga bahin diin anaa na ang pagpangliki sa mga yuta.
Bastante na kaayo ang katawhan nga moulan panahon sa kaadlawon ug moinit panahon sa adlaw.
Apan ning padangaton nga panahon sa ting-ulan, sigurado nga ang problema na usab sa baha ang atong atubangon. Duna ra bay mga dapit dinhi sa siyudad nga bisan dili lang mag-usa ka oras ang pagbundak sa ulan apan kong kusog kaayo makasinati na dayon kita og pagbaha.
Niadtong niaging semana, dunay pagpanghinlo sa Bitan-ag creek ang gihimo sa Hapsay Sapa Team inabagana sa Barangay Council sa Barangay 22 pinangulohan ni Barangay Chairman Eldo Casino ug ang konseho sa Barangay Lapasan.
Kining Bitan-ag creek panahon nga moapaw na ang tubig tungod sa kusog nga ulan mao na dayon ang hinungdan pagbaha sa kasikbit nga mga dapit.
Barado sa daghan nga mga basura ang maong creek, ambot kong kanus-a maleksyon ang katawhan paglabay sa ilang mga basura sa insakto ug dili ipanglabay diha sa creek.
Angay na gyud nga estriktohon ang katawhan nga nanimuyo duol niini aron sila makakat-on tungod kay sila ra man gihapon ang maapketohan panahon sa pagbaha.
Busa karon pa lang, manglimpyo na kita ug mag-anad na pagdisiplina sa atong mga gagmayng bata ingon man sa atong kaugalingon diha sa insakto nga paglabay sa atong mga basura.