ILIGAN CITY -- Patay na nga nahidangat sa tambalanan ang usa ka negosyante human gipusil niadtong Sabado sa Quezon Avenue Extension, Pala-o, ning dakbayan.

Sa report sa kapulisan nga sa pagsulod ni Rolando “Dodong” Trinidad Lim sa gate sa iyang balay, kalit nga mi-abot ang usa ka motorsiklo nga adunay usa ka angkas.

Ang nag-angkas mao'y mipusil sa biktima gamit ang kalibre .45, base sa mga basiyo sa bala nga nakuha gikan sa crime scene.

Onse ka basiyo sa bala ug upat ka bullet lead ang nakit-an sa Scene of the Crime Operatives sa dapit kung asa nahitabo ang pagpamusil.

Matud ni Lawyer Alex O. Cabornay, hepe sa National Bureau of Investigation (NBI)–Iligan District Office, nga nakit-an sa footage sa closed circuit television camera sa silingan nga nakapang-lock pa sa gate ang biktima pagsulod niini dihang mi-abot ang nag-motorsiklo ug kalit nga mipusil kang Lim.

Sa pagsulat ning balita, mibalibad pa ang pamilya sa biktima nga magpa-interview apan matod pa ni Cabornay nga miingon ang pamilya niini nga wala sila'y mahinumduman nga nakabikil sa negosyo ang namatay.

“Meron lang recently na parang hindi maganda yung relasyon niya with a certain (police) official na pina-relieve niya. ‘Yan po ang tinitingnan natin na anggulo,” matud sa pamilya.

Ilado si Lim nga suod nga higala ni Iligan City Lone District Representative Vicente F. Belmonte Jr.

Miingon si Belmonte sa interview sa Sun.Star Superbalita nga una na niyang nadunggan gikan sa pamilya sa namatay nga ang pagpangutong sa usa ka opisyal sa pulis ang hinungdan sa request ni Lim aron kini ibalhin o ipa-transfer.

Si Lim adunay negosyo nga bakery ug carwash.

Financier kini, matud pa ni Belmonte, og "masiao" apan dili na sigurado ang kongresista kung padayon pa kini sa maong negosyo hangtud niadtong higayon nga kini gipusil-patay.