COMPOSTELA, Davao De Oro -- Patay ang usa ka negosyante human pusila sa wala mailhing mga armado samtang namahaw kauban sa iyang mga trabahante didto sa Purok 3, Barangay Maparat, alas 8:30 sa buntag, niadtong Sabado.
Ang biktima giila nga si Arjay Sotomil Hebra, 40-anyos, mag-uuma, negusyante ug molupyo sa Purok 3, Barangay Poblacion.
Base sa inisyal nga imbestigasyon, ang biktima uban sa iyang trabahante nga namahaw atubangan sa Marites Store dihang miabot ang duha ka wala mailhing mga lalaki sakay sa motorsiklo nga walay plaka.
Nasayran nga wa’y daghang istorya mihulbot og armas ang nakaangkas nga suspek ug gipusil ang biktima tumong sa nagkadaiyang parte sa lawas.
Human sa kremin, daling nangagiw palayo ang mga suspek paingon sa direksyon sa Brgy. Mapaca, Compostela.
Samtang ang biktima gidala sa Comval Provincial Hospital sa lungsod sa Montevista apan, wa makalahutay ug nabugtuan sa gininhawa.
Narekober gikan sa crime scene ang upat ka basiyo sa .45 nga pistola.
Motibo sa krimen lakip ang matud nga identity sa mga suspek padayon pa karong gisusi sa mga kapulisan diha sa ilang imbestigasyon. (DTV)