GITULIS ang duha ka mga babaye niadtong Sabado sa buntag sa Velez-Del Pilar Street ning siyudad sa Cagayan de Oro.

Nadala ang mahalong cellphone nga iPhone 4S ug Nokia ug usa ka libo nga kwarta nila Floreza Namoco ug Shiela Mae Cuenca, beauty specialist sa Barbra Pearls, nga nahimutang sa maong dapit sa duha ka wala maila nga mga tulisan.

Subay sa report sa kapolisan sa Police Station 1 (PS1) sa Divisoria nga armado og kalibre 9mm ang tulisan.

Unang misulod ang usa sa mga suspetsado ug mideklara og hold-up kinsa mao usab ang mition ginamit ang kalibre 9mm Glock nga pistol ngadto kay Namoco.

Samtang kalit usab nga misulod ang laing suspetsado diin mao'y mi-abli sa desk drawer ug gikuha ang salaping cash nga anaa sulod niadtong lakip na ang ilang mag cellphone ug daling mipalayo sa maong dapit.

Ang suspetsado nga mition sa biktima adunay gitas-on nga 5’5, sakto lang ang panglawas diin nakahelmet og itom ug puti nga kombinasiyon sa kolor ug naka itom og jacket, samtang ang kauban niini sakto lamang usab ang panglawas diin maoy mikuha sa kwarta ug sa mahalong cellphone sa mga biktima.

Sa pagsulat niini nga balita, padayon pa ang gipahigayong imbestigasiyon sa kapolisan sa PS1 aron sa posibleng pag-ila ug pagsikop sa mga suspetsado.