NISAKA ang gidaghanon sa mga sakop sa Cagayan de Oro City Police Office (Cocpo) nga nagpositibo sa ginadiling nga druga human sa gipahigayon nga random drug testing.
Kini nga gikumpirma ni Police Chief Inspector Lemuel Gonda, hepe sa Operation and Plans Branch sa Cocpo kinsa miingon nga dili pa niya manganlan ug masuta kung pila ka buok ang nadugang labina ang naghupot sa ilang kaso mao man ang administration sa Cocpo.
Apan matud ni Gonda nga sa miabot nga report kaniya, adunay dagko og posisyon nga nadugang sa listahan sa nagpositibo.
Gibutyag ni Gonda nga subo man kaayo nga aduna gihapon mga pulis nga nalambigit niini taliwala sa pipila ka mga higayon nga pagpahigayon sa random drug testing diin kapin 30 na ka mga polis ang nagpositibo ug kasamtangan nga aduna nay giatubang nga mga kaso.
Dugang ni Gonda nga wala nila gihunong ang ilang gilusad nga "Oplan Linis Bahay" sa Cocpo aron gayudd malimpyo ug mawala ang mga polis nga aduna'y illegal nga mga binuhatan.
Gipasabot ni Gonda nga kadtong mga istasyon sa pulis, nga humana og drug testing, nga sorpresahon usab sila og bisita aron masapon gayud ang mibuhat og dili maayo.
Nanawagan si Gonda sa iyang mga kaubang polis nga unta hunungon na ang mga dili maayong binuhatan ug pagamitan ingon man paghupot og mga ginadili nga druga.
Gipasalamatan usab niini ang katawhan nga kung dili tungod sa mga pagpadala og mensahe kon text, dili masuta nga aduna'y dili maayong gikalambigitan ang ilang kwerpo sa kapolisan.